Guti sheh garë të fortë për Topin e Artë dhe përmend katër kandidatë

Guti, ish-lojtari i Real Madridit, parashikon një konkurrencë të fortë mes Kylian Mbappes dhe Lamine Yamalit për fitimin e Topit të Artë këtë vit, çmim që do të akordohet të hënën.

Eventi prestigjioz do të zhvillohet më 26 tetor në Londër. Yamal, Mbappe dhe Harry Kane konsiderohen ndër favoritët kryesorë për trofeun individual, ndërsa në listën e pretendentëve të përmendur nga Guti është edhe Rodri.

“Do të më pëlqente shumë që ta fitonte Mbappe, por gjithçka është e mundur. Mendoj se gara është shumë e hapur. Mbappe, Lamine, Rodri, madje edhe Harry Kane, kanë mundësi”, deklaroi fillimisht Guti.

Sipas tij, ky është një nga edicionet më të paparashikueshme të çmimit, pasi secili prej kandidatëve mund të triumfojë. Guti shtoi se nuk do të befasohej nëse Topi i Artë do t’i shkonte Mbappes ose Yamalit, të cilët i cilësoi si futbollistë të jashtëzakonshëm.

Ish-mesfushori i Real Madridit foli gjithashtu me vlerësim për zhvillimin e jashtëzakonshëm të Yamalit, si dhe për paraqitjet e tij në nivel të lartë gjatë këtij sezoni.

“Lamine ka shumë vetëbesim dhe aktualisht po luan në një nivel tepër të lartë. Ai është një prej futbollistëve më vendimtarë të Barcelonës, por edhe një nga lojtarët me ndikimin më të madh në futbollin botëror”, u shpreh ai.

Guti pranoi se, pavarësisht se Yamal luan për Barcelonën, klub ndaj të cilit ai nuk ka simpati të veçantë, cilësitë e talentit spanjoll nuk mund të mohohen.

“Është e qartë se, edhe pse aktivizohet te Barcelona dhe unë nuk jam një tifoz i madh i atij klubi, duhet pranuar se ai është një lojtar fantastik. Nëse vazhdon në këtë mënyrë, me siguri do të jetë pretendent për çmimin Lojtari i Vitit dhe për Topin e Artë në vitet e ardhshme. E pret një e ardhme shumë premtuese”, përfundoi ish-ylli i Real Madridit.