Goditje e rëndë për Brojën, trajneri “zyrtarizon” qëndrimin e qartë të klubit të rënë nga kategoria

Armando Broja është në telashe, pasi kjo verë, mund ta detyrojë që të nisë për të disatën herë kërkimin për një sistemim të ri. Kjo, pasi te klubi i Bërnlit me sa duket nuk shohin të ardhme për sulmuesin shqiptar në radhët e tyre.

Trajneri Majkëll Xhekson, i emëruar për të mbyllur këtë sezon pas shkarkimit te Skot Parker dhe rënies nga kategoria, qartësisht kishte për detyrë në javët e mbetura të aktivizonte futbollistë që i interesojnë më shumë klubit, për t’i vendosur në vitrinë për një shitje të mundshme apo për t’i përgatitur për sezonin e ardhshëm. Dhe Broja nuk është mes tyre.

Minutat e tij me Xhekson kanë qenë me pikatore dhe në ndeshjen e kaluar ndaj Aston Vilës, ai u la në stol gjatë gjithë takimit. Sot, në sfidën ndaj Arsenalit, tekniku ka bërë të qartë se Broja nuk është pjesë e projektit, pasi as nuk e ka grumbulluar për sfidën në fjalë, duke e lënë spektator në këtë duel.

Kësisoj, për sulmuesin e Kombëtares shqiptare bëhet e qartë se duhet të fillojë të kërkojë një sistemim të ri, pasi vështirë se do të gjejë hapësira në këtë skuadër në sezonin e ardhshëm në Championship.