Goditja e fundit e Real Madridit: Zyrtarizohet oferta për Yan Diomande

Real Madrid ka ndërmarrë një hap konkret në merkato, duke i paraqitur një ofertë zyrtare klubit të Leipzig për talentin e krahut, Yan Diomande. Bisedimet mes palëve janë duke u zhvilluar për të arritur një akord për sulmuesin 19-vjeçar.

Paris Saint-Germain vijon të shfaqë interes për lojtarin e Kombëtares së Bregut të Fildishtë dhe vetë Diomande e shihte me ëndësi një kalim në Francë. Megjithatë, gjigantët spanjollë, të cilët janë kampionët në fuqi të Europës, nuk kanë treguar ende shenja se janë të gatshëm të plotësojnë kërkesat financiare të Leipzig për ta lënë të lirë lojtarin këtë verë.

Më 24 qershor, mediumi The Athletic zbuloi se Real Madrid ishte në kërkim të një sulmuesi të djathtë, si masë parandaluese në rast të një largimi të mundshëm të Brahim Diaz gjatë këtij afati kalimtar. Pavarësisht se lojtari maroken ka shprehur dëshirën për të vijuar aventurën e tij në Madrid, drejtuesit e klubit po e shtypin pa pushim pedalen e gazit për të siguruar shërbimet e Diomande.

Talenti nga Bregu i Fildishtë u transferua te Leipzig një sezon më parë nga skuadra spanjolle Leganés. Më herët gjatë verës, edhe Liverpool kishte shfaqur interesim serioz për të, duke dërguar një propozim që luhatej rreth shifrës së 100 milionë eurove.

Skuadra gjermane, nga ana e saj, ka vendosur një çmim që i afrohet më shumë 130 milionë eurove. Paralelisht, ajo po bën përpjekje për të bindur futbollistin, marrëveshja aktuale e të cilit përfundon në qershor të 2030-ës, të firmosë një kontratë të re. Në radhët e Leipzig ekziston optimizëm se Diomande do të veshë fanellën e tyre edhe kur të mbyllet kjo dritare merkatoje.

Pas rikthimit të Jose Mourinhos në stol, Real Madrid ka qenë ndër klubet më aktive në këtë sesion veror. Deri tani, agimi i epokës së re ka sjellë në kryeqytetin spanjoll emra si Bernardo Silva, Ibrahima Konate, Denzel Dumfries dhe Marc Cucurella.

Po të premten, The Athletic njoftoi gjithashtu se kampionët e Spanjës janë duke ndërtuar një strategji edhe për një tjetër operacion bombastik, atë të mesfushorit Rodri nga Manchester City.