Goditja e Alban Xhaferit mund të ketë pasoja të rënda, Vllaznia rrezikon dënimin e ashpër sipas precedentit të Kamzës

Një incident i rëndë ka tronditur futbollin shqiptar mbrëmjen e kaluar, teksa vëmendja u zhvendos nga terreni i lojës në sjelljen e presidentit të Vllaznisë, Alban Xhafari. Gjatë barazimit 1-1 mes Elbasanit dhe shkodranëve në javën e dytë të “Abissnet Superiore”, raportohet se Xhafari ka ushtruar dhunë fizike ndaj asistentit të arbitrit, Ergys Spahiu, duke e goditur me grusht.

Ky akt sjell në kujtesë një tjetër episod të errët, kur një zyrtar klubi kapërceu çdo kufi. Ngjarja na kthen pas në vitin 2019, në një përballje të Superligës midis Kamzës dhe Laçit, e luajtur në stadiumin e Kamzës. Atë ditë, tensionet shpërthyen kur presidenti i ekipit vendas, Naim Qarri, dhunoi gjyqtarin kryesor Eldorjan Hamiti.

Pasojat për Kamzën ishin katastrofike. Komisioni i Etikës dhe Disiplinës në Federatën Shqiptare të Futbollit mori një masë ekstreme, duke e detyruar klubin të zbresë direkt në Kategorinë e Dytë, pra në nivelin e tretë të piramidës futbollistike në vend.

Tani, Vllaznia ndodhet përballë një situate të ngjashme dhune, e shkaktuar nga figura e saj kryesore drejtuese. Nëse organet disiplinore vendosin të ndjekin të njëjtën linjë si në rastin e vitit 2019, pasojat për klubin verior mund të jenë shumë më të rënda nga çfarë pritet aktualisht në kampin shkodran.

Një sinjal i fortë për një vendim të ashpër erdhi menjëherë nga vetë Federata Shqiptare e Futbollit. Në reagimin e saj zyrtar të mbrëmjes së djeshme, FSHF bëri të qartë se çështja do të trajtohet me rigorozitet maksimal brenda kuadrit rregullator. “Strukturat përkatëse disiplinore do të veprojnë konform rregulloreve në fuqi dhe me pavarësi të plotë gjatë marrjes së masave,” theksoi federata.

Po ashtu, FSHF paralajmëroi se nuk do të tolerojë asnjë formë presioni apo dhune ndaj zyrtarëve të ndeshjeve. Në komunikatë u nënvizua se “FSHF do të qëndrojë fort në mbrojtje të gjyqtarëve dhe çdo zyrtari tjetër nga aktet e dhunës, frikësimet dhe trysnitë. Debatet, kritikat apo pakënaqësitë për vendimet e arbitrimit janë pjesë e lojës, por ekziston një kufi që nuk guxon të shkelet nga askush: ai i ushtrimit të dhunës fizike.”