Gjimshiti kritikon paraqitjen ndaj San Marinos: Humbëm shumë topa dhe duhet të luajmë si skuadër

Pas fitores 2–1 ndaj San Marinos, në ndeshjen e vlefshme për Ligën e Kombeve, Berat Gjimshiti foli për mediat dhe analizoi paraqitjen e Shqipërisë.

Mbrojtësi kuqezi pranoi se bëhej fjalë për një nga ndeshjet më të vështira të karrierës së tij, duke theksuar se ekipi duhet të nxjerrë mësime nga kjo sfidë.

“Vështirë të kem luajtur një ndeshje të tillë në karrierën time. Duhet të kuptojmë se duhet të veprojmë si skuadër. Kur ka sukses ekipi, atëherë vjen edhe suksesi individual. Edhe unë, me atë që bëra në fushë, mund të kisha kontribuar më shumë duke dalë përpara. Siç e kam thënë edhe më herët, duhet të marrim shumë mësime nga kjo ndeshje.

20 minutat e para ishin të mira, por më pas niveli ynë ra dhe luajtëm dobët. U krijua përshtypja se çdo lojtar kërkonte të shënonte, ndërsa duhet të funksionojmë së bashku. Kemi ende shumë aspekte për të përmirësuar.

Çfarë nuk funksionoi? Përqendrimi. Mund të pësosh gol nga çdo kundërshtar, ndaj në çdo ndeshje duhet të jesh 100% i fokusuar. Gjithashtu, humbëm shumë topa të thjeshtë. Ata u shfaqën më agresivë dhe, në disa momente, m’u duk sikur kishin më shumë cilësi se ne.

Nuk kam fjalë për ditën e sotme. Të gjitha këto elemente ndikuan në paraqitjen tonë. Nëse nuk punojmë sa duhet me këmbët, duhet të punojmë me kokën. Këtë e kam mësuar nga trajnerët me të cilët kam punuar. Mentaliteti është gjëja kryesore”, u shpreh Gjimshiti.