Gjilani mposht 3-2 Malishevën në derbin me penallti të pritur e katër gola pas pushimit

Derbi i javës së 13-të në elitën e futbollit kosovar përfundoi me fitoren 3-2 të Gjilanit përballë Malishevës. Në një takim plot emocione, ku katër gola u realizuan në pjesën e dytë, gjilanasit siguruan tri pikë të rëndësishme për luftën në krye të renditjes.

Ky sukses e çon Gjilanin në vendin e katërt me 22 pikë. Malisheva, ndërkohë, ruan pozitën e dytë me 27 pikë, dy pas Prishtinës kryesuese, e cila numëron 29 pikë dhe ka zhvilluar një ndeshje më pak.

Fillimi i përballjes foli për Gjilanin, që e zhbllokoi rezultatin në minutën e 11-të. Pas një pasimi vendimtar të Ardian Limanit, Arjol Bllaca gjeti rrjetën dhe vendosi shifrat 1-0.

Me nisjen e pjesës së dytë erdhi edhe përgjigjja e Malishevës. Në minutën e 47-të, Rimal Haxhiu shërbeu për Valmir Nafiun, i cili barazoi rezultatin në 1-1.

Mundësia për të kaluar në avantazh iu paraqit mysafirëve në minutën e 73-të, kur u akordua penallti në favor të tyre. Nafiu mori përsipër ekzekutimin, por Marijan Coric bëri një pritje të shkëlqyer, duke ia mohuar golin nga pika e bardhë.

Vetëm pesë minuta pas penalltisë së humbur, ishte Gjilani që goditi sërish. Në minutën e 78-të, Bllaca shënoi për herë të dytë në këtë ndeshje dhe i dha skuadrës së tij epërsinë 2-1.

Avantazhi i vendasve u thellua në minutën e 87-të, kur Bllaca këtë herë dha asistimin për Bleart Tolajn. Ky i fundit e përfundoi aksionin me gol, duke e çuar rezultatin në 3-1.

Malisheva vazhdoi të kërkonte golin dhe në minutën e 92-të Xhemajl Ibishi shkurtoi diferencën në 3-2. Realizimi i tij i shtoi emocionet e derbit, por nuk mjaftoi për t’i shpëtuar mysafirët nga humbja.