Giaccherini trazon opinionin: Lojtarët e Juventusit duhet të përballen edhe fizikisht

Emanuele Giaccherini, ish-futbollisti i Juventusit dhe aktualisht konsulent profesional, ka analizuar krizën e klubit torinez në një intervistë për gazetën italiane Gazzetta dello Sport.

Sipas tij, Juventusi po kalon një nga momentet më të vështira të dy dekadave të fundit. Humbja kundër Lazios, në vlerësimin e Giaccherinit, ka ndikuar më tej në gjendjen e rënduar brenda skuadrës.

“Nëse nuk marrim parasysh periudhat kur ekipin e drejtonin Thiago Motta dhe Igor Tudor, Juventusi duket se ka marrë më pak pikë në shtatë ndeshjet e para krahasuar me sezonet e mëparshme. Disfata ndaj Lazios i rëndoi edhe më shumë të gjithë dhe e përkeqësoi klimën në klub”, deklaroi ai.

Giaccherini u ndal edhe te mënyra se si skuadra duhet të reagojë për ta kthyer situatën në favorin e saj. Ai kërkoi që futbollistët të mblidhen pa praninë e trajnerit, të flasin hapur dhe të përballen me përgjegjësitë e tyre për rezultatet negative.

“Duhet të qëndrojnë në dhomën e zhveshjes, pa trajnerin, dhe të diskutojnë për gjithçka, deri aty sa të ketë edhe një përplasje fizike mes tyre. Ndoshta pas një momenti të tillë secili do të japë më shumë nga vetja.

Para se të mendojnë për shkarkimin e Spallettit, lojtarët duhet të analizojnë veten, të rivlerësojnë gjendjen dhe të pranojnë realitetin, duke marrë secili përgjegjësinë që i takon. Në këtë mënyrë, Spalletti nuk do të kishte më arsye për t’u justifikuar. Aktualisht, ai mund të argumentojë se përgjegjësia nuk bie vetëm mbi të, por edhe mbi lojtarët”, u shpreh ish-futbollisti.

Në pjesën e fundit të intervistës, Giaccherini komentoi edhe mundësinë e rikthimit të Antonio Contes në stolin e Juventusit, pasi emri i tij po përmendet gjithnjë e më shumë si kandidat për këtë post.

“Nëse synon të fitosh, me Conten është e vështirë të gabosh. Megjithatë, duhet të jesh gati ta mbështesësh në çdo kërkesë që ai bën”, përfundoi Giaccherini.