Franca e Brazili ngrenë alarmin për gjendjen e fushës në stadiumin e finales së Botërorit 2026

Gjatë fazës së grupeve të Kupës së Botës 2026, Franca dhe Brazili kanë ngritur shqetësime të forta për cilësinë e tapetit në “MetLife Stadium” në East Rutherford, në Shtetet e Bashkuara.

Sipas lojtarëve dhe stafit teknik të dy përfaqësueseve, sipërfaqja e lojës ka qenë shumë e fortë, e thatë dhe e pabarabartë në disa pjesë, duke ndikuar drejtpërdrejt te qarkullimi i topit dhe niveli i lojës.

Pas përballjes me Senegalin, mesfushori i Francës, Adrien Rabiot, tha se fusha “dukej si bar artificial” dhe ishte “shumë e fortë”, ndërsa shtoi se topi lëvizte në mënyrë të paparashikueshme.

I njëjti vlerësim erdhi edhe nga mbrojtësi William Saliba, i cili po ashtu kritikoi kushtet në fushë.

Më herët, pakënaqësi të ngjashme kishte shprehur edhe ylli brazilian Vinicius Junior.

Sulmuesi i Brazilit vuri në dukje se temperaturat e larta dhe kushtet e thata e dëmtojnë me shpejtësi barin natyral, gjë që e vështirëson kontrollin e lojës dhe ndërtimin e aksioneve.

Në një ton më të përmbajtur u shpreh trajneri i Francës, Didier Deschamps, i cili pranoi se kushtet nuk janë ideale, por theksoi se skuadra duhet të përshtatet.

“Duhet të mësohemi me këto kushte. Mund të ketë pak beton nën sipërfaqen e barit. Bari këtu është shumë i shkurtër. Megjithatë, ne do të përshtatemi. Është e qartë se kjo ndryshon disa aspekte të lojës, por ne i marrim parasysh këto detaje teknike”, deklaroi Deschamps.

Në javët e para të Botërorit 2026, cilësia e fushave është kthyer në një nga çështjet më të përfolura, ndërsa organizatorët pritet të mbajnë nën vëzhgim të afërt gjendjen e terreneve për pjesën e mbetur të turneut.