Forma në rritje te Liverpooli, Wirtz reagon ndaj kritikave

Florian Wirtz ka dhënë një tjetër paraqitje pozitive me Liverpoolin, këtë herë në fitoren 2-0 ndaj Brightonit, duke iu përgjigjur edhe kritikave të shumta për lojën e tij.

Pas një fillimi sezoni të shoqëruar me vërejtje për paraqitjet e tij, mesfushori gjerman duket se po rikthehet në nivelin e pritur dhe po luan një rol të rëndësishëm në rezultatet e fundit të skuadrës.

Shifrat e tij në katër ndeshjet e fundit flasin qartë për këtë përmirësim: Wirtz ka dhënë tri asistime dhe ka shënuar një gol, duke rritur ndikimin në repartin ofensiv të ekipit anglez.

Edhe pse paraqitjet e tij kanë marrë vëmendje të madhe nga mediat dhe janë shoqëruar me diskutime të vazhdueshme, futbollisti tha se opinionet e të tjerëve nuk e shqetësojnë dhe se ai mbetet i përqendruar vetëm te futbolli.

“Ndoshta jam thjesht një djalë interesant. Unë vetëm luaj futbollin tim. Nëse njerëzit duan të flasin për mua apo të më gjykojnë, kjo është puna e tyre. Unë nuk përqendrohem te këto gjëra”, deklaroi Wirtz.

“Unë thjesht dua të luaj futboll dhe nuk mund të bëj më shumë se kaq”, shtoi reprezentuesi gjerman.

Me formën e tij të fundit, Wirtz po përpiqet të mbyllë pas krahëve periudhën e vështirë të nisjes së sezonit dhe të tregojë cilësitë që zotëron te Liverpooli. Përmirësimi i tij përbën një sinjal inkurajues për skuadrën në pjesën e mbetur të sezonit.