Foda miraton kalimin e Fisnik Asllanit te Leipzig: Zotëron cilësi të rralla

Një lëvizje e rëndësishme drejt Bundesligës duket në horizont për Fisnik Asllanin. Sulmuesi i përfaqësueses së Kosovës po lidhet intensivisht me një transferim te skuadra e Leipzigut.

Mungesa e Asllanit në dy ndeshjet e para përgatitore të Hoffenheimit ka tërhequr vëmendjen. Ai nuk u paraqit në miqësoren me ekipin e kategorisë së katërt, SGV Heilbronn-Freiberg, dhe po ashtu ishte i padisponueshëm të shtunën kundër Greuther Furthit, që garon në Bundesligën 2.

Mospërfshirja e tij në këto takime përkon me raportimet e mediave prestigjioze gjermane, përfshirë të përditshmen sportive Kicker, sipas të cilave Hoffenheimi po shmang çdo risk me lojtarin kosovar, pasi ai pritet të vijojë karrierën te Leipzig.

25-vjeçari mund të cilësohet si një nga shitjet më të bujshme të klubit gjatë kësaj vere. Shifrat që qarkullojnë flasin për një marrëveshje që mund t’i kushtojë Leipzigut rreth 30 milionë euro.

Talenti i tij nuk ka kaluar pa u vënë re, pasi më herët për të janë interesuar gjigantë si Barcelona dhe Borussia Dortmund. Megjithatë, reputacioni që e shoqëron në futbollin gjerman merr një dimension të ri përmes fjalëve të trajnerit të Kosovës, Franco Foda.

Në një bisedë për gazetën gjermane LVZSport, Foda ka analizuar në detaje aftësitë e Asllanit, duke veçuar instinktin e tij brenda zonës së rreptësisë.

“Fisniku zotëron cilësi të rralla në zonë. Teknikisht është shumë i kompletuar, lëviz me lehtësi në hapësira të kufizuara dhe është i fortë në duelet ajrore. Mbron topin me efikasitet dhe ka një ndjeshmëri të lartë për situatat e lojës. Me të në fushë, skuadra fiton thellësi në sulm, sepse ai shënon dhe kontribuon me pasime vendimtare”, ka theksuar Foda.

Përzgjedhësi ka shkuar më tej në vlerësimin e tij, duke nënvizuar edhe anën njerëzore e taktike të lojtarit. Ai e përshkruan Asllanin si një futbollist që vendos interesat e grupit mbi shifrat vetjake, me një kontribut të çmuar edhe në fazën e rikuperimit të topit.

“Përtej gjithçkaje që thashë, ai është një lojtar skuadre, gjithmonë i gatshëm për të ndihmuar. Punon jashtëzakonisht shumë për të rifituar zotërimin e topit. Futbolli për të është një pasion i vërtetë dhe ka një uri të pashuar për gola”, ka shtuar Foda.

Këto komente mbërrijnë pas një sezoni mbresëlënës për Asllanin me fanellën e Hoffenheimit. Ai e përmbylli edicionin me 11 gola dhe 10 asistime në 35 ndeshje në Bundesligë dhe në Kupën e Gjermanisë.