Florin Bratu para debutimit me Partizanin: Edlir Tetova është ndër trajnerët më të mirë në Shqipëri

Partizani do ta nisë këtë të shtunë aventurën në “Abissnet Superiore” përballë Teutës. Takimi i javës së parë do të luhet në stadiumin e Vorës dhe do të startojë në orën 16:00. Në prag të kësaj sfide, trajneri i të kuqve, Florin Bratu, foli për sezonin e ri dhe për kundërshtarin.

“Për mua dhe për Partizanin nis një kapitull i ri. Në dy muajt e fundit kanë ndodhur shumë ndryshime dhe shpresojmë ta fillojmë në mënyrën më të mirë. Përballë do të kemi një ekip të fortë, të drejtuar nga një trajner shumë i mirë. Edlir Tetova është një nga trajnerët më të mirë në Shqipëri dhe unë di gjithçka për të. Ai e transformoi Egnatian dhe fitoi shumë trofe me atë skuadër. Për këtë arsye, na pret një përballje e vështirë dhe intensive, por besoj se jemi gati”, deklaroi Bratu.

Sa i përket përgatitjeve, tekniku i Partizanit tha se ndeshjet miqësore i kanë ndihmuar të testojë idetë e tij taktike dhe të improvizojë me disa futbollistë në përbërje. “Këto takime na shërbyen për të provuar disa ide rreth skuadrës dhe për të vlerësuar lojtarët në aspektin taktik, sipas filozofisë sime. Mendoj se jemi në progres dhe po përmirësohemi vazhdimisht. Tani është koha të presim kampionatin”, u shpreh ai.

I pyetur për objektivat e sezonit, Bratu nënvizoi se Partizani synon gjithmonë trofetë. “Objektivat e këtij klubi janë titulli kampion, Kupa e Shqipërisë dhe pjesëmarrja në Kupat e Evropës. Kjo është edhe një mënyrë për të treguar respekt ndaj tifozëve tanë. Edhe këtë sezon duam të bëjmë të njëjtën gjë dhe kemi ambicien të japim maksimumin çdo ditë e në çdo ndeshje. Lojtarët janë më të rëndësishëm se unë dhe së bashku do të përpiqemi të bëjmë më të mirën për këtë klub të madh shqiptar”, tha trajneri.

Bratu foli edhe për afrimet e reja, duke pranuar se disa prej tyre janë bashkuar me skuadrën vonë dhe nuk e kanë arritur ende formën optimale. “Disa futbollistë janë afruar në një fazë të vonë të përgatitjeve. Disa prej tyre nuk janë ende gati, por kanë eksperiencën e nevojshme për të debutuar këtë sezon dhe për ta ndihmuar ekipin, pasi pikërisht për këtë arsye kanë ardhur”, sqaroi ai.

Në fund, trajneri iu drejtua tifozëve të Partizanit me një apel për mbështetje. “E di se gjatë tre viteve të fundit Partizanit i kanë munguar trofetë dhe e kuptoj se kjo ka qenë e vështirë për tifozët. Megjithatë, pres që ata të na qëndrojnë pranë, sepse janë tifozeria më e bukur në Shqipëri. I ftoj të jenë të pranishëm në Vorë dhe ta mbështesin skuadrën”, përfundoi Florin Bratu.