Flamuri kuq e zi me kokë poshtë, reagon ashpër FSHF: Ngjarje e rëndë, e dërgojmë në UEFA

Mbrëmjen e djeshme, Shqipëria humbi me rezultatin 2-0 përballë kombëtares çeke, në një ndeshje që u shoqërua me incidente të rënda me karakter racist dhe përdhosje të simboleve kombëtare shqiptare.

Federata Shqiptare e Futbollit, ka dënuar publikisht këto akte të papranueshme, duke i cilësuar si sulm ndaj vlerave të sportit dhe respektit midis kombeve.

Në përgjigje të situatës, FSHF ka njoftuar se do të kërkojë masa të menjëhershme disiplinore nga UEFA, duke theksuar se futbolli duhet të jetë një lojë që bashkon popujt dhe promovon barazinë.

REAGIMI I FSHF:

“Federata Shqiptare e Futbollit dënon me forcë aktet e turpshme që ndodhën gjatë ndeshjes së sotme kundër Çekisë. Koret raciste dhe përdhosja e flamurit shqiptar janë të patolerueshme dhe nuk i takojnë fushës së futbollit. Ky akt i rëndë përbën një sulm të hapur ndaj vlerave të futbollit dhe respektit midis kombeve.

Federata Shqiptare e Futbollit dënon fuqimisht çdo formë të racizmit dhe fyerjes ndaj simboleve kombëtare dhe do të dërgojë një notë proteste në UEFA, duke kërkuar masa të menjëhershme disiplinore. FSHF reagoi menjëherë që në pushimin e pjesës së parë duke u kërkuar organizatorëve marrjen e masave të menjëhershme ndaj këtyre akteve për të mos radikalizuar veprimet me ndërprerjen e lojës.

Futbolli është një lojë që bashkon dhe unifikon gjithë popujt duke promovuar barazinë dhe respektin për të gjithë, pavarësisht kombësisë apo përkatësisë etnike. Shqiptarët, si pjesë e familjes së madhe futbollistike, do të qëndrojnë gjithmonë në mbrojtje të këtyre vlerave dhe nuk do të tolerojnë asnjë formë racizmi apo urrejtjeje duke dënuar me forcë çdokënd që tenton të përdhosë bukurinë e këtij sporti.

Pavarësisht ndeshjes së sotme, Kombëtarja jonë ka treguar gjithmonë forcë dhe guxim për të përballuar çdo vështirësi duke u ngritur pikërisht atëherë kur lind nevoja. Bashkë me tifozët do të lëmë pas këtë ndeshje dhe bëhemi gati për të shkuar në Gjeorgji për një rezultat pozitiv.

Tifozët çekë u shfaqën në tribuna me flamuj serbë, me mbishkrime Kosova është Serbi si dhe me flamurin shqiptar mbi të cilin kishin vendosur një shenjë ‘X’. Gjithashtu përplasje pati dhe mes tifozërive të dy kampeve”, shkruan FSHF.