Fitore e madhe për Maqedoninë në Kazakistan, tani është lider i grupit

Përfaqësuesja e Maqedonisë ka marrë fitore të madhe dhe tejet të rëndësishme në udhëtimin më të vështirë të këtij cikli kualifikues për Botërorin 2026, duke mposhtur Kazakistanin në Astanë me rezultat minimal 0-1, njofton Telegrafi.

Me këtë fitore, “verdhëkuqtë” ngjiten në vendin e parë të grupit me tetë pikë, një më shumë se Uellsi që do të luajë me Belgjikën.

Ndeshja u zhvillua në kushte të vështira në terren me bari artificial dhe me shumë duele fizike. Trajneri Milevski, i cili mungoi për shkak të pezullimit, kishte bërë disa ndryshime në formacion, përfshirë edhe debutimin e Despotovskit në mbrojtje dhe rikthimin e Trajkovskit në sulm. Ishte pikërisht Trajkovski që vendosi fatin e takimit me një goditje nga e majta në minutën e 33-të, për kryesim e që doli në fund të jetë rezultati përfundimtar.

Kazakët kërcënuan disa herë portën e Dimitrievskit, madje goditën edhe shtyllën në pjesën e parë dhe kërkuan një penallti që u refuzua pas konsultimit me VAR-in.

Në pjesën e dytë, vendasit shtuan presionin, por mbrojtja e Maqedonisë rezistoi me sukses, me Visar Musliun që ishte shtyllë e pathyer.

Maqedonia në fund arriti ta ruajë epërsinë dhe të marrë tri pikë të arta në garën për një vend në Kampionatin Botëror. Kujtojmë se në këtë ndeshje për Maqedoninë luajtën nga minuta e parë futbollistët shqiptarë, kapiteni Bardhi, Aliski dhe Musliu, ndërsa nga banka rezerve u inkuadrua Elezi.

Ndeshja e radhës për Maqedoninë do të jetë më 7 shtator në Shkup ndaj Lihtenshtajnit, ndërsa më 10 shtator do të udhëtojë në Bruksel për t’u përballur me Belgjikën.