Finn Azaz po shqyrton largimin nga Irlanda pas sfidës me Izraelin

Konflikti në Lindjen e Mesme la gjurmë edhe në përballjen e Ligës së Kombeve mes Irlandës dhe Izraelit, e cila u shoqërua me qëndrime simbolike dhe diskutime të forta brenda ekipit irlandez.

Para fillimit të ndeshjes, lojtarët e Irlandës nuk ua zgjatën dorën kundërshtarëve izraelitë, ndërsa gjatë himneve qëndruan me shikimin e drejtuar nga toka. Pas golit të tretë të Irlandës, Jack Moylan hoqi shiritin e zi nga krahu dhe e puthi atë.

Shiritat ishin vendosur në kujtim të viktimave të konfliktit. Federata Irlandeze kishte bërë gjithashtu të ditur se një pjesë e shpërblimeve të futbollistëve do të dhurohej për qëllime humanitare.

Situata ndikoi edhe në formacionin e ekipit. Portieri Gavin Bazunu nuk pranoi të luante, duke iu referuar bindjeve të tij politike dhe morale për zhvillimet në Gaza.

Bazunu deklaroi se vendimi i tij lidhej me bindjen se “vrasja e njerëzve të pafajshëm është e gabuar”. Ai sqaroi se qëndrimi nuk ishte i drejtuar kundër popullit izraelit apo komunitetit hebre, por kundër asaj që po ndodh në rajon.

Një prej futbollistëve të përfshirë më drejtpërdrejt në këtë situatë është Finn Azaz, reprezentuesi i Irlandës dhe mesfushori i Southamptonit.

Azaz ka prejardhje izraelite nga ana e nënës. Nëna dhe gjyshja e tij janë izraelite, ndërsa ai ka rrëfyer më parë se gjyshja kishte shërbyer si gjenerale në ushtrinë izraelite.

Pavarësisht kësaj lidhjeje familjare, kur duhej të vendoste se cilën kombëtare do të përfaqësonte, ai zgjodhi Irlandën. Babai i tij ka prejardhje nga Corku dhe kjo lidhje ndikoi në vendimin e futbollistit.

Para përballjes me Izraelin, Azaz mbajti një fjalim emocional në prani të bashkëlojtarëve. Në dhomat e zhveshjes u diskutua edhe mundësia e zhvillimit të ndeshjes, bojkotimit të saj ose përdorimit të sfidës për të përcjellë një mesazh.

Kështu, 26-vjeçari u përball me një konflikt të ndjeshëm personal, mes rrënjëve izraelite të nënës dhe gjyshes së tij dhe zgjedhjes për të luajtur me Irlandën në arenën ndërkombëtare.

Sipas raportimeve, Azaz tani po e shqyrton mundësinë e një vendimi tjetër të rëndësishëm: largimin nga përfaqësuesja irlandeze.

Ai ka zhvilluar 15 ndeshje me Irlandën dhe ka shënuar një gol. Megjithatë, ende nuk dihet nëse do ta ndërmarrë përfundimisht këtë hap gjatë periudhës së ardhshme.

Azaz nuk luajti në takimin e zhvilluar mbrëmë, në të cilin Irlanda fitoi ndaj Izraelit me rezultatin 3-0.