FIFA vëzhgon motin në Filadelfia, ndeshja Paraguai – Francë mund të shtyhet

FIFA ka bërë të ditur se po ndjek me vëmendje të madhe kushtet atmosferike në Filadelfia, përpara përballjes së Kupës së Botës mes Paraguait dhe Francës, e parashikuar të fillojë në orën 23:00.

Institucioni që drejton futbollin botëror ka pranuar se ekziston një “rrezik i lartë” që takimi të mos zhvillohet sipas planit, për shkak të temperaturave ekstreme që pritet të mbizotërojnë në kohën e ndeshjes.

Parashikimet tregojnë se në momentin e startit temperaturat mund të shkojnë deri në 37 gradë celsius, ndërsa indeksi i nxehtësisë mund të arrijë në 42 gradë celsius, duke i bërë kushtet shumë të vështira si për futbollistët, ashtu edhe për tifozët.

Për këtë arsye, FIFA po shqyrton mundësinë e një shtyrjeje të ndeshjes në një orar më të vonë, me synimin që temperaturat të ulen dhe të shmangen rreziqet për shëndetin.

Një element tjetër i rëndësishëm është fakti se stadiumi në Filadelfia është i hapur, çka nënkupton se dielli pritet të mbulojë pothuajse të gjithë fushën dhe tribunat gjatë zhvillimit të takimit.

Një ditë më parë, Franca është stërvitur në kushte shumë të nxehta, me temperatura rreth 38 gradë celsius në orarin e ndeshjes, në qendrën stërvitore të Philadelphia Eagles, vetëm pak kilometra nga stadiumi.

Lidhur me këtë situatë kanë folur edhe përzgjedhësit Didier Deschamps dhe Gustavo Alfaro, të cilët kanë pranuar vështirësinë e të luajturit në temperatura ekstreme, por njëkohësisht kanë nënvizuar domosdoshmërinë e marrjes së masave mbrojtëse për lojtarët.