Stuhia në Filadelfia mund të vonojë ose ndalë sfidën Francë – Irak në Kupën e Botës

Ndeshja Francë – Irak, e programuar për xhiron e dytë të Grupit I në Kupën e Botës 2026, rrezikon të zhvillohet me vonesa ose edhe të ndërpritet për shkak të motit të keq të paralajmëruar në Filadelfia.

Takimi është caktuar të nisë në orën 23:00, ndërsa Franca kërkon një fitore për të vulosur kalimin në fazën eliminatore. Megjithatë, kushtet atmosferike mund të pengojnë rrjedhën normale të ndeshjes.

Meteorologu francez Guillaume Sechet ka bërë të ditur se ka afërsisht 60 për qind gjasa që gjatë përballjes të ketë stuhi të shoqëruara me rrufe. Sipas tij, ky sistem moti pritet të prekë një zonë të gjerë të Bregut Lindor të Shteteve të Bashkuara, nga jugu deri në veri të shtetit të Nju Jorkut.

“Zona e prekur është shumë e gjerë, por ende ekziston mundësia që disa rajone, përfshirë Filadelfian, të mos goditen drejtpërdrejt nga stuhia”, ka deklaruar Sechet për mediumin francez L’Equipe.

Parashikimet tregojnë se moti mund të përkeqësohet rreth orës 22:00, pra vetëm një orë para nisjes së takimit.

“Kur këto stuhi shfaqen, ato zakonisht janë shumë të forta. Momentet e para të stuhisë janë zakonisht më problematiket”, shtoi ai.

Rregullat e FIFA-s në rast të rrufeve

Në Shtetet e Bashkuara janë në fuqi masa të ashpra sigurie për aktivitetet sportive kur ka stuhi me rrufe. Në rast se konstatohet një goditje rrufeje brenda një distance prej rreth 13 kilometrash nga stadiumi, ndeshja pezullohet menjëherë.

Pas kësaj, futbollistët kthehen në dhomat e zhveshjes, ndërsa tifozët drejtohen drejt zonave të sigurta në stadium. Më pas nis një pritje 30-minutëshe dhe, nëse gjatë asaj kohe nuk ka rrufe të tjera, ndeshja lejohet të rifillojë.

Megjithatë, nëse regjistrohet një tjetër goditje rrufeje, numërimi nis sërish nga e para, çka mund të sjellë vonesa të gjata.

Siç raporton L’Equipe, FIFA nuk ka vendosur një kufi maksimal për kohëzgjatjen e ndërprerjeve në raste të tilla, duke lënë të hapur edhe mundësinë e shtyrjes së ndeshjes nëse kushtet atmosferike nuk përmirësohen.