FIFA kërkohet të pezullojë gjashtë lojtarë të Argjentinës para finales së Botërorit ndaj Spanjës

FIFA po përballet me kërkesa për të vendosur sanksione të rënda ndaj deri në gjashtë futbollistëve të Argjentinës, pak përpara finales së Kupës së Botës 2026 kundër Spanjës.

Argjentina e Lionel Scalonit arriti në finalen e madhe pasi përmbysi Anglinë me rezultatin 2-1. Enzo Fernandez dhe Lautaro Martinez realizuan golat që siguruan kualifikimin, por ndeshja u shoqërua me debat edhe jashtë aspektit sportiv.

Disa lojtarë argjentinas u regjistruan në video para përballjes në stadiumin e Atlantës, teksa këndonin këngë të lidhura me Ishujt Falkland, ose Malvinas. Ky territor ishte shkaku i luftës mes Argjentinës dhe Britanisë së Madhe në vitin 1982.

Reagimet u intensifikuan pas largimit të Anglisë nga turneu, kur disa futbollistë të Argjentinës u panë me një pankartë ku shkruhej “Las Malvinas son Argentinas”, që do të thotë “Malvinat janë argjentinase”.

Rregullat e FIFA-s ndalojnë përdorimin e deklaratave dhe mesazheve politike në veprimtaritë zyrtare të futbollit. Për këtë arsye, janë shtuar kërkesat që futbollistët argjentinas të ndëshkohen.

Politikani britanik Ed Davey, udhëheqës i Partisë Liberal Demokrate, është mes atyre që ka kërkuar publikisht nga FIFA pezullimin e gjashtë lojtarëve të Argjentinës për finalen përballë Spanjës.

Davey e vuri këtë situatë në krahasim me ngjarjen e vitit 2024, kur UEFA dënoi me një ndeshje pezullim Rodrin dhe Alvaro Moratën, pasi ata kishin kënduar sloganin “Gibraltari është Spanjë” gjatë festimeve.

“Rodri dhe Alvaro Morata u pezulluan me të drejtë për një takim në gusht të vitit 2024, pasi kënduan ‘Gibraltari është Spanjë’. Tashmë edhe lojtarëve argjentinas që festuan me pankartën ‘Falklandet janë argjentinase’ duhet t’u ndalohet paraqitja në finale”, deklaroi Davey.

Në një prononcim për Sky News, ai bëri të ditur se i ka nisur një letër presidentit të FIFA-s, Gianni Infantino.

“Këto janë rregulla që ai duhet t’i zbatojë dhe të kujdeset që të respektohen. Veprimi i lojtarëve argjentinas përbënte një mesazh të qartë politik dhe shkelje të rregulloreve të FIFA-s. Për më tepër, është fyes për banorët e Ishujve Falkland dhe për familjet e veteranëve që humbën jetën gjatë pushtimit të paligjshëm”, tha ai.