Ferdinand ngre në qiell Bellinghamin: Në moshën 23-vjeçare ka bërë më shumë se Zidane, Lampard, Xavi dhe Gerrard

Rio Ferdinand ka bërë një krahasim të bujshëm mes Jude Bellinghamit dhe disa prej emrave më të mëdhenj të historisë së mesfushës, duke vlerësuar se anglezi ka arritur më shumë se ata në moshën 23-vjeçare.

Gjatë podcastit “Rio Presents”, ish-mbrojtësi i Anglisë përmendi Steven Gerrardin, Frank Lampardin, Zinedine Zidanen dhe Xavin si pika reference për të evidentuar progresin e jashtëzakonshëm të futbollistit të Real Madridit.

“Zoti Jude Bellingham, nëse e krahason atë që ka bërë në moshën 23-vjeçare me legjendat e tjera. Steven Gerrard sapo ishte emëruar kapiten i Liverpoolit në moshën 23-vjeçare. Frank Lampard iu bashkua Chelseat gjashtë ditë para se të mbushte 23 vjeç”.

Ferdinand kujtoi gjithashtu se Zinedine Zidane zhvilloi debutimin me Kombëtaren e Francës kur ishte 22 vjeç, ndërsa Xavi në atë periudhë sapo po konsolidohej si një prej lojtarëve kryesorë të Barcelonës dhe e fitoi për herë të parë Ligën e Kampionëve vetëm në moshën 26-vjeçare.

“Nuk po them se ai është më i mirë se ndonjëri prej këtyre lojtarëve, sepse është ende herët në karrierën e tij, por në moshën 23-vjeçare, duke e krahasuar me ta në të njëjtën moshë, ai po i tejkalon dukshëm të gjithë”, deklaroi Ferdinand.

Me këtë vlerësim, Ferdinand nënvizoi ritmin e rrallë të progresit të Bellinghamit, i cili pas transferimit te Real Madridi është kthyer në një nga lojtarët qendrorë të klubit dhe të futbollit evropian.