EURO U21 2027 / UEFA nis inspektimin e stadiumeve pritëse në Shqipëri

Shqipëria ka hyrë në një fazë të re të përgatitjeve për Kampionatin Europian U21, i cili do të zhvillohet në vitin 2027. Delegacioni i UEFA-s ka mbërritur në vend dhe ka nisur verifikimin e impianteve ku do të luhen ndeshjet e turneut.

Inspektimi filloi në stadiumin “Loro Boriçi” të Shkodrës. Më pas, grupi i UEFA-s do të vijojë me “Elbasan Arena”, përpara se të ndalet në Tiranë, në “Arena Kombëtare” dhe “Arena e Demave”.

Kontrollet përfshijnë analizimin e kushteve teknike, infrastrukturës dhe kapaciteteve organizative të të katër stadiumeve, me synim përmbushjen e kërkesave për zhvillimin e EURO U21 2027.

Turneu pritet të përbëjë aktivitetin më të madh sportiv të organizuar në Shqipëri gjatë vitit 2027. FSHF dhe UEFA po bashkëpunojnë për të siguruar që përgatitjet të realizohen sipas standardeve më të larta.