Enzo Fernández: Jam gati të ndihmoj Manchester Cityn të fitojë trofe

Enzo Fernández ka folur për herë të parë pas transferimit te Manchester City, duke shprehur lumturinë për kalimin dhe vendosmërinë për të dhënë kontribut në kapitullin e ri të karrierës së tij.

Mesfushori argjentinas e cilësoi klubin e ri si ekipin më të suksesshëm në Angli gjatë viteve të fundit, ndërsa theksoi se çdo futbollist do të dëshironte të ishte pjesë e një strukture të tillë.

“Manchester City është klubi më i suksesshëm në Angli në kohët e fundit. Çdo lojtar dëshiron të jetë pjesë e një klubi të tillë, sepse të gjithë e dinë se sa mirë është i organizuar City”.

Fernández deklaroi se mezi pret të nisë punën dhe premtoi se do të angazhohet për të ndihmuar skuadrën të vijojë sukseset.

“Nuk mund të isha më i lumtur që jam këtu dhe jam gati për sfidën për ta ndihmuar Cityn të vazhdojë të fitojë trofe. Ky është një klub i ndërtuar për sukses”.

Ai vlerësoi gjithashtu cilësinë e grupit dhe tha se synon të përfitojë nga bashkëpunimi me shokët e rinj të skuadrës.

“Nëse shikoni përbërjen e skuadrës, City ka cilësi në çdo repart. Dua të mësoj nga bashkëlojtarët e mi të rinj dhe të bëhem një lojtar më i mirë”.

Argjentinasi nënvizoi se puna e palodhur ka qenë gjithmonë pjesë e mënyrës së tij të përgatitjes dhe se do të vazhdojë të japë maksimumin edhe te Manchester City.

“Jam krenar që vazhdimisht përpiqem ta përmirësoj lojën time. Kushdo që ka punuar me mua e di se sa shumë stërvitem çdo ditë dhe sa shumë jap në ndeshje. Jap absolutisht gjithçka dhe mund t’i premtoj Manchester Cityt se kjo do të vazhdojë edhe tani që jam këtu”, deklaroi Fernández.

Fernández shprehu mirënjohjen e tij ndaj drejtuesve të klubit për besimin dhe përpjekjet që bënë të mundur përfundimin e marrëveshjes.

“Dua të falënderoj Hugo, Enzon, Khaldoon dhe të gjithë te City që e bënë të mundur këtë marrëveshje. Dua ta shpërblej besimin që më është dhënë sa më shpejt të jetë e mundur”, shtoi ai.

Fernández, 25-vjeçar, kaloi te Manchester City nga Chelsea dhe ka firmosur kontratë deri në verën e vitit 2031.