Endrick në radarët e pesë gjigantëve të Ligës Premier

Situata e Endrickut te Real Madridi po ndiqet me vëmendje nga pesë prej klubeve më të mëdha të Ligës Premier, të cilat mund të tentojnë transferimin e tij gjatë afatit kalimtar të verës.

Fabrizio Romano raporton se Chelsea, Arsenali, Manchester United, Manchester City dhe Liverpooli janë klubet që po monitorojnë nga afër të ardhmen e sulmuesit brazilian.

Interesimi i Liverpoolit nuk është i ri, pasi klubi anglez kishte shqyrtuar mundësinë e transferimit të Endrickut gjatë verës. Edhe Arsenali kishte kontaktuar me Real Madridin për të diskutuar një lëvizje të mundshme.

Pavarësisht këtyre zhvillimeve, drejtuesit madrilenë kanë përcjellë më herët mesazhin se nuk dëshirojnë ta lejojnë largimin e futbollistit.

Endrick vazhdon të konsiderohet pjesë e rëndësishme e projektit të Real Madridit për vitet e ardhshme.

20-vjeçari e mbylli pjesën e dytë të sezonit të kaluar në huazim te Lyoni. Gjatë qëndrimit te klubi francez, ai zhvilloi 21 ndeshje, shënoi tetë gola dhe regjistroi po aq asistime.

Edhe pse vëmendja e klubeve angleze është e madhe, Real Madridi ka sinjalizuar se synimi i tij është ta mbajë Endrickun në skuadër dhe ta ndihmojë të përparojë më tej.

Tash pritet të shihet nëse interesimi i pesë klubeve të Ligës Premier do ta bindë “Los Blancos” të ndryshojë qëndrim gjatë merkatos së verës.