Edon Zhegrova përfiton një mundësi të re për t’u dëshmuar te Juventusi

Edon Zhegrova do ta ketë sërish rastin të tregojë vlerat e tij me fanellën e Juventusit.

Sezoni i parë i sulmuesit të Kosovës ishte zhgënjyes, pasi u shoqërua me lëndime të shumta dhe aktivizim të kufizuar. Megjithatë, trajneri i “Zonjës së Vjetër”, Luciano Spalletti, ka vendosur t’i ofrojë atij një tjetër mundësi për të dëshmuar cilësitë që zotëron.

Gazeta e njohur italiane “Gazzetta dello Sport” raporton se Juventusi ka pranuar t’ia përmbushë dëshirën Zhegrovës për të qëndruar në klub edhe për një vit tjetër.

Kjo mundësi është krijuar nga qëndrimi i Nico Gonzalez. Mesfushori argjentinas ia ka bërë të ditur klubit italian se nuk e sheh të ardhmen e tij në Torino.

“Nico Gonzalez e ka bërë tashmë të qartë se nuk është i interesuar për të qëndruar në Torino. Ka mundësi reale që argjentinasi t’i bashkohet një ekipi të ri. Ai dëshiron të qëndrojë te Atletico, por negociatat nevojiten për ta kompletuar marrëveshjen”, shkruan gazeta italiane.

Sipas të njëjtit burim, synimi i Nicos për t’u larguar i hap rrugë Zhegrovës që të marrë një tjetër shans dhe të lërë pas paraqitjet e dobëta të sezonit të tij të parë.

Gjatë gjithë verës, reprezentuesi i Kosovës ka shprehur qartë dëshirën për të vazhduar qëndrimin në Torino. Përveçse nuk pranoi të zhvillonte negociata me klubet që shfaqën interesim, ai iu bashkua më herët edhe fazës përgatitore.

Objektivi i Zhegrovës është të sigurojë sa më shpejt vendin e tij te Juventusi, ndërsa në muajin shtator synon të rikthehet si titullar edhe te Kombëtarja e Kosovës.