Drenica inauguron reflektorët në “Bajram Aliu” me triumf të thellë 4-0 ndaj Llapit

Drenica ka regjistruar një triumf të thellë në xhiron e shtatë të Superligës së Kosovës, duke e mposhtur Llapin 4-0 në stadiumin “Bajram Aliu” në Skenderaj.

Mbrëmja ishte historike për stadiumin, ku për herë të parë u zhvillua një ndeshje nën ndriçimin e reflektorëve. Tribunat u mbushën me një numër të madh tifozësh, të cilët krijuan atmosferë të veçantë.

Skuadra vendase e mori kontrollin që në fillim dhe kaloi në epërsi në minutën e 14-të, kur Gjergji Kote realizoi golin e parë të takimit.

Presioni i Drenicës vazhdoi edhe në pjesën e mbetur të fraksionit të parë. Adrian Durmishaj e çoi rezultatin në 2-0 në minutën e 41-të, ndërsa tri minuta më pas Kote shënoi sërish, duke realizuar golin e tij të dytë personal dhe të tretin për vendasit.

Me avantazhin 3-0 në pushim, Drenica e administroi më lehtë pjesën e dytë. Llapi kërkoi të kundërpërgjigjej, por nuk ia doli ta ndryshonte kahun e ndeshjes.

Rezultati përfundimtar u përcaktua në minutën e 70-të, kur Agim Zeka shënoi golin e katërt dhe kompletoi fitoren 4-0 në një mbrëmje të paharrueshme për Drenicën në “Bajram Aliu”.

Pas këtij suksesi të rëndësishëm, Drenica numëron 9 pikë, kurse Llapi mbetet me vetëm 3 pikë pas shtatë xhirove.