Drama, surpriza dhe mrekulli në dy netët e Champions

Netët e 24 dhe 25 shkurtit mbyllën fazën e playoff-eve të Ligës së Kampionëve 2025-26, me tetë ekipe që siguruan kalimin në raundin e 16-të dhe me emocione që nuk munguan asnjë minutë.

Të martën filloi surpriza e madhe e dy netëve. Bodø/Glimt nuk është thjesht një ekip norvegjez, është tashmë një legjendë. Norvegjezët fituan 2-1 në San Siro dhe eliminuan Interin me shifrat 5-2 në total, duke i dhënë fund aventurës europiane të kampionëve të Italisë. Interi dominoi me 70% zotërim dhe 33 goditje, por nuk mjaftoi. Jens Petter Hauge shënoi golin vendimtar dhe shkroi historinë. Në të njëjtën mbrëmje, Atlético Madrid shkatërroi Club Brugge 4-1, Leverkusen kaloi Olympiakos pa lejuar gol dhe Newcastle dëmtoi rëndë Qarabağ-un 3-2 në një ndeshje rutinë.

Të mërkurën drama u dyfishua. Atalanta luajti ndoshta ndeshjen e mbrëmjes, ktheu defiçitin 0-2 nga ndeshja e parë, dhe me golin e Samarxhiçit nga penalltia në minutën e 98-të, kaloi Dortmundin me rezultatin 4-1 dhe 4-3 në total të të dy ndeshjeve. “Bernabéu” ofroi tensionin e tij, Reali i Madridit mundi Benficën 2-1 me Vinícius Júnior vendimtar, por atmosfera ishte e ngarkuar pas raportimeve të javës së kaluar mbi ofendim racist ndaj sulmuesit brazilian, tifozat e Benficës “sulmuan” gjatë gjithë ndeshjes ndërsa UEFA kishte pezulluar lojtarin Prestianni. PSG kaloi Monacon me rezultatin e përgjithshëm 5-4, pas një barazimi dramatik 2-2 në ndeshjen e dytë, ku kartoni i kuq ndaj Coulibaly vendosi fatin e gjërave.

Por drama e vërtetë e natës ishte Juventus kundër Galatasaray. Bardhezinjtë ishin në disavantazh të 3 golave pas takimit të parë, barazuan këtë rezultat me 10 lojtarë pas kartonit të kuq të Lloyd Kellyt, dhe arritën ta çonin ndeshjen në 5-5 falë golave të Locatelli, Gatti dhe McKennie. Ndeshja shkoi në kohë shtesë dhe aty Osimhen shkatërroi ëndrrat italiane me golin që dha Galatasaray-t kualifikimin me 6-5 në total, ndërsa Yilmaz vulosi gjithçka me golin në minutën e 120 në 7-5. Një prej netëve më të çmendura të Ligës së Kampionëve në vite.

Tetë ekipet e kualifikuara direkt janë Arsenal, Barcelona, Bayern München, Chelsea, Liverpool, Manchester City, Sporting CP dhe Tottenham dhe tashmë presin rivalët e tyre.

Nga playoff-et kaluan Atlético Madrid, Leverkusen, Newcastle, Bodø/Glimt, Atalanta, Real Madrid, PSG dhe Galatasaray. Shorti për raundin e 16-të zhvillohet më 27 shkurt, me ndeshjet e para të planifikuara për 10-11 mars.