Diomande i shton Mourinhos dilemat për vendin e Viniciusit

Yan Diomande po fiton terren në garën për një vend titullari te Real Madridi, pasi la përshtypje të fortë edhe në humbjen 2-1 ndaj Atletico Madridit.

Sulmuesi nga Bregu i Fildishtë është afruar tashmë drejtpërdrejt me Vinicius Juniorin, i cili nuk po kalon një periudhë të mirë në nisje të këtij sezoni.

Edhe pse u aktivizua vetëm në minutën e 54-t, Diomande arriti të ndikojë në lojën e Real Madridit. Jose Mourinho e hodhi në fushë në vend të Viniciusit, pasi skuadra kishte mbetur me dhjetë lojtarë për shkak të kartonit të kuq të Dean Huijsen.

Vetëm pak minuta pas hyrjes së tij, Reali pësoi golin e dytë, por 19-vjeçari vazhdoi të kërkonte hapësira dhe të krijonte rrezik nga krahu i djathtë.

Gjatë 36 minutave në fushë, Diomande realizoi katër nga gjashtë driblimet e provuara, pati 90 për qind saktësi në pasime dhe fitoi nëntë nga 12 duelet.

Numri i driblimeve të tij ishte i barabartë me totalin e Viniciusit dhe Kylian Mbappes së bashku në të gjithë ndeshjen, pavarësisht se Diomande luajti në një ekip që ishte me një lojtar më pak.

Paraqitja në derbi ishte një tjetër tregues i potencialit të tij, pas një periudhe gjatë së cilës Mourinho e kishte menaxhuar me kujdes minutazhin e sulmuesit të ri.

Diomande iu bashkua Real Madridit nga RB Leipzig për një transferim rekord të klubit, vlera e të cilit mund të shkojë deri në 140 milionë euro, përfshirë bonuset.

Pas përfshirjes graduale në skuadër, ai e nisi nga minuta e parë ndaj Rayo Vallecanos dhe Elches, ndërsa për derbin e Madridit e filloi takimin nga stoli.

Në krahun tjetër, Viniciusi u zëvendësua pas një tjetër paraqitjeje nën nivelin e pritshmërive. Braziliani e pranoi vendimin e Mourinhos dhe, sapo përfundoi ndeshja, u drejtua menjëherë në dhomat e zhveshjes.

Sipas “AS”, pas rikthimit nga ndeshjet e kombëtareve, Diomande pritet të hyjë në konkurrencë të drejtpërdrejtë me Viniciusin për një vend në formacionin titullar të Mourinhos.

Forma e shfaqur në minutat e fundit i ka krijuar trajnerit portugez një dilemë të re për përzgjedhjen e formacionit.