Dëmtimi i Adrion Pajazitit shqetëson Shqipërinë, mesfushori rrezikon disa javë mungesë

Adrion Pajaziti u bashkua sipas planit me grumbullimin e Kombëtares së Shqipërisë, por gjatë ditës pritet t’u nënshtrohet ekzaminimeve të tjera mjekësore. Këto kontrolle do të përcaktojnë shkallën e dëmtimit dhe kohën e nevojshme për rikuperim.

Mesfushori i Hajdukut u dëmtua të dielën në derbin e Adriatikut ndaj Rijekës dhe dyshohet se ka prekur muskulin kuadriceps. Nuk përjashtohet as mundësia e një këputjeje, ndërsa diagnoza përfundimtare ende nuk është konfirmuar.

Nëse këputja e muskulit konfirmohet, vlerësimet e para parashikojnë një mungesë prej tri deri në katër javësh. Në këtë rast, Pajaziti do të largohej nga grumbullimi kuqezi dhe nuk do të mund të luante as në dy ndeshjet e rëndësishme që Hajduku ka pas pushimit ndërkombëtar.

Futbollisti shqiptar ka qenë një nga lojtarët e rëndësishëm të skuadrës së Gonzalo Garcias gjatë këtij sezoni. Ai numëron 14 paraqitje në të gjitha garat, me një gol dhe dy asistime.

Në kampionat, Pajaziti ka startuar nga minuta e parë në të shtatë ndeshjet e zhvilluara deri tani.

Tani pritet që stafi mjekësor i Kombëtares së Shqipërisë të përcaktojë përmasat e sakta të dëmtimit. Pas këtij vlerësimi do të bëhet e qartë nëse ai do të jetë i gatshëm për ndeshjet e rëndësishme që Hajdukun e presin në tetor.