Cucurella loton duke folur për autizmin e djalit: Në negociata me Real Madridin, kushti i parë ishte mirëqenia e tij

Pas paraqitjes madhështore me kombëtaren spanjolle në Kupën e Botës, mbrojtësi Marc Cucurella është rikthyer në qendër të vëmendjes mediatike.

Loja e tij e shkëlqyer gjatë rrugëtimit triumfues të Spanjës drejt titullit kampion bote u pasua nga një temë shumë personale, e cila ka prekur thellë opinionin publik: lidhja e veçantë me të birin katërvjeçar, i diagnostikuar me çrregullim të spektrit të autizmit.

Futbollisti i krahut të majtë dhe partnerja e tij, Claudia Rodriguez, kanë vendosur së fundmi të flasin hapur për sfidat e përditshme që sjell rritja e Mateos së vogël. Në një intervistë televizive, tashmë lojtari i Real Madridit nuk i përmbajti dot emocionet dhe shpërtheu në lot.

“Po e hap këtë bisedë për herë të parë dhe është tejet e rëndë për mua. Ndjej një dhimbje të madhe, shpesh herë ndihem i pafuqishëm, sidomos kur e shoh që nuk është mirë. Më vërshojnë ndjenjat. Është e domosdoshme të flitet për këtë eksperiencë,” rrëfeu fillimisht Cucurella.

“Kjo temë më bën jashtëzakonisht të prekshëm, të jem i sinqertë. Megjithatë, gëzohem që ndodhem këtu, sepse më në fund po ndaj publikisht historinë time. Shikoni si më bëtë… Më vjen keq, më falni,” shtoi ai, teksa lotët i ndërprenë fjalën.

Përveç Mateos, çifti Cucurella ka edhe një vajzë të quajtur Bella si dhe një djalë tjetër që mban emrin Rijo.

Edhe bashkëshortja e tij, Claudia, ka rrëfyer më herët për periudhat e vështira që kanë kaluar si familje.

“Mateo erdhi në jetë katër vite më parë dhe që në fillim vumë re disa sjellje të ndryshme nga bashkëmoshatarët e tij. Kopshti nuk na ofroi shumë mbështetje; ata ishin muajt më të tmerrshëm. E linim duke qarë sa herë shkonim. Tani shumëçka ka ndryshuar, por gjetja e një shkolle të përshtatshme, e terapive dhe e ushqimit të duhur mbetet ende një sfidë e vazhdueshme,” shpjegoi ajo.

Gjatë verës, Cucurella u transferua nga Chelsea i Londrës në kryeqytetin spanjoll. Një nga pikat kyçe të marrëveshjes me klubin madrilen ishte pikërisht garancia që klubi t’i ofronte të birit të tij kushtet optimale të jetesës dhe përkujdesjes.

“Ai na ka dhënë leksione të mëdha. Ne jemi të detyruar të mendojmë për të në çdo moment dhe të shmangim çdo aktivitet që mund të mos i bëjë mirë. Edhe pushimet tona janë gjithmonë të ndërlikuara,” shtoi zonja Rodriguez në rrëfimin e saj.

Mbrojtësi i “Los Blancos” zbuloi gjithashtu arsyen e vërtetë pas flokëve të gjatë e kaçurrela, që janë kthyer në shenjën e tij dalluese: dëshiron që i biri ta identifikojë pa vështirësi në fushë, në çdo rrethanë.