Club Brugge investon 200 milionë euro për stadiumin e ri modern me ekran gjigant mbi fushë

Club Brugge po përgatitet të nisë një etapë të re, përmes ndërtimit të një stadiumi të ri që do të ketë një kosto të përafërt prej 200 milionë eurosh.

Impianti, për të cilin klubi belg ka punuar prej gati dy dekadash, do të ketë 40,116 vende, të gjitha të mbuluara.

Projekti i stadiumit është prezantuar në një video të publikuar në YouTube nga kanali ProBuilds, ku shfaqen më qartë arkitektura dhe mënyra e organizimit të impiantit.

Një prej hapësirave më të mëdha do të jetë tribuna veriore, e projektuar për rreth 12 mijë tifozë. Ajo do të ndërtohet si një strukturë e pandarë, pa diferencë mes sektorit të poshtëm dhe atij të sipërm, duke krijuar një zonë të gjerë për mbështetësit më të zjarrtë të Club Brugge.

Stadiumi i ri do të ndryshojë ndjeshëm nga impianti aktual Jan Breydel. Në projekt janë parashikuar qoshe të mbyllura dhe tribuna të bashkuara në të katër anët, çka do t’i japë objektit një formë më kompakte dhe do t’i afrojë spektatorët me fushën.

Koncepti arkitekturor synon gjithashtu të forcojë atmosferën gjatë ndeshjeve. Vendosja e tribunave dhe trajtimi akustik do të ndihmojnë në përqendrimin e zhurmës së tifozëve brenda stadiumit, duke krijuar një mjedis më intensiv për lojtarët dhe publikun.

Çatia do të ndërtohet sipas një zgjidhjeje të veçantë teknike, e cila përfshin një unazë të brendshme kompresimi dhe një unazë të jashtme tensioni.

Ky sistem është menduar për të kufizuar lartësinë e përgjithshme të stadiumit, duke ruajtur njëkohësisht pamjen e lirë të spektatorëve drejt fushës. Të gjitha ulëset do të jenë të mbuluara dhe nga çdo sektor pritet të ofrohet shikueshmëri e mirë.

Realizimi i projektit është shoqëruar me një proces të gjatë administrativ dhe ligjor. Një pengesë e rëndësishme u kapërcye në korrik të vitit 2026, kur u rrëzua një ankesë kundër lejes së ndërtimit.

Punimet përgatitore filluan në fund të tetorit, ndërsa faza kryesore e ndërtimit pritet të nisë në fillim të vitit 2027. Objektivi i klubit është që stadiumi të përfundojë në verën e vitit 2029, përpara startit të sezonit 2029/30.

Investimi prej rreth 200 milionë eurosh pritet të kryhet pa subvencione nga shteti. Projekti nuk përfshin vetëm stadiumin, por edhe sistemimin e hapësirave publike e të gjelbra, së bashku me ambiente të tjera të destinuara për komunitetin lokal.

Pas përfundimit të punimeve, Club Brugge do të lërë pas stadiumin Jan Breydel dhe do të zhvendoset në një impiant të ri, të përshtatur me standardet moderne të futbollit dhe me kapacitet për më shumë se 40 mijë tifozë.