Ciro Immobile i jep fund futbollit profesionist pas një karriere mbresëlënëse

Ciro Immobile ka vendosur të largohet nga futbolli profesionist në moshën 36-vjeçare, duke mbyllur një karrierë të jashtëzakonshme, të spikatur veçanërisht nga paraqitjet e tij në Serie A.

Sulmuesi italian ua bëri të ditur sot vendimin bashkëlojtarëve të Paris FC, në një moment të ngarkuar me emocione, gjatë të cilit nuk arriti t’i përmbante lotët.

Edhe pse kontrata e tij me klubin francez ishte e vlefshme deri në qershor të vitit 2027, dëmtimet e vazhdueshme e shtynë Immobilen të ndërpriste karrierën.

Ai u transferua te Paris FC në janar, pasi kishte kaluar një periudhë të shkurtër me Bolognën. Gjatë sezonit të kaluar, Immobile zhvilloi vetëm 12 ndeshje për skuadrën franceze, duke shënuar dy gola dhe dhënë dy asistime.

Në total, italiani e përfundon rrugëtimin e tij me 350 gola në 656 ndeshje, shifra që përbëjnë një nga bilancet më të spikatura në futbollin italian.

Për kombëtaren e Italisë, Immobile regjistroi 57 paraqitje dhe realizoi 17 gola. Ai ishte gjithashtu pjesë e ekipit që triumfoi në Euro 2020, turne i fituar në vitin 2021, ndërsa gjatë karrierës u shpall katër herë Capocannoniere, si golashënuesi më i mirë i Serie A.

Periudhën kryesore të karrierës e kaloi te Lazio, ku luajti nga viti 2016 deri në 2024. Me klubin kryeqytetas, ai u rendit mes golashënuesve më të mëdhenj në historinë e skuadrës.

Gjatë gjithë karrierës, Immobile përfaqësoi Salernitanën, Juventusin, Sienën, Grosseton, Pescarën, Genoan, Torinon, Borussia Dortmundin, Sevillan, Lazion, Besiktasin, Bolognën dhe Paris FC.