Chelsea drejt goditjes së madhe në merkato, Granit Xhaka arrin akordin personal

Chelsea është duke përgatitur një lëvizje për Granit Xhakën, pasi sipas një raporti Xabi Alonso u ka kërkuar pronarëve të klubit, BlueCo, që të mbyllin marrëveshjen për mesfushorin e Sunderlandit.

Alonso, që do të marrë zyrtarisht drejtimin e Chelseat më 1 korrik, e njeh mirë Xhakën nga bashkëpunimi i tyre i mëparshëm te Bayer Leverkusen.

Të dy triumfuan në Bundesligë dhe në Kupën e Gjermanisë gjatë sezonit 2023/24, ndërsa në po atë edicion shkuan edhe deri në finalen e Europa League.

Në verën e vitit 2025, Xhaka u largua nga Bayer për t’u transferuar te Sunderland, në një marrëveshje me vlerë totale prej 17.3 milionë paundësh.

Mesfushori 33-vjeçar, ish-lojtar i Arsenalit, ishte ndër paraqitjet më të spikatura në Premier League sezonin e kaluar dhe luajti rol vendimtar për Sunderlandin.

Aktualisht ai është i angazhuar me Zvicrën në Kupën e Botës 2026, ndërsa në edicionin e fundit të Ligës Premier regjistroi 32 ndeshje si titullar dhe dy të tjera si zëvendësues.

Gjatë atij sezoni, Xhaka realizoi një gol dhe dha gjashtë asistime, teksa Sunderland e mbylli kampionatin në vendin e shtatë, duke siguruar një vend në Ligën e Evropës për sezonin 2026/27.

Edhe pse është i lidhur me kontratë me Sunderlandin deri në vitin 2028, Chelsea synon ta transferojë nga ‘Stadium of Light’ në këtë afat kalimtar veror.

Sipas gazetarit gjerman Florian Plettenberg, marrëveshja mes palëve tashmë është arritur dhe mbetet vetëm që dy klubet të gjejnë gjuhën e përbashkët.