“Çështja Negreira” shkund themelet e futbollit spanjoll, Real Madridi apelon në UEFA që t’i shfuqizojë Barcelonës tërë trofetë e arritura

Sipas raportimeve të gazetës AS, Real Madridi ka dërguar një kërkesë zyrtare drejt UEFA-s, duke synuar që Barcelonës t’i anulohen të gjitha titujt e fituar në harkun kohor kur klubi katalanas gëzonte lidhje financiare me Jose Maria Enriquez Negreira, ish-nënkryetarin e Komitetit Teknik të Arbitrave (CTA).

Mediumi spanjoll thekson se gjiganti madrilen ka insistuar që Barcelona të vërë në dispozicion dosjen e plotë për vitet 2010-2018, me qëllim që të hetohet se çfarë mekanizmash parandalues kishte instaluar klubi kundër korrupsionit sportiv dhe nëse ata mekanizma ishin funksionalë në praktikë.

Skandali i njohur si “Negreira” doli në sipërfaqe gjatë vitit 2023, kur drejtuesit e Barcelonës u vunë përballë akuzave të rënda për korrupsion, të lidhura drejtpërdrejt me shumat e transferuara te Negreira, i cili në atë periudhë shërbente si zëvendëspresident i CTA-së në kuadër të Federatës Spanjolle të Futbollit (RFEF).

Hetimet nxorën në dritë që klubi blaugrana kishte derdhur disa milionë euro në llogaritë e shoqërive që kishin lidhje me Negreiran, transaksione këto që shtriheshin nga viti 2001 deri më 2018.

Autoritetet gjyqësore spanjolle e kanë cilësuar këtë aferë si vepër penale, duke vënë në lëvizje një proces hetimor që edhe sot e kësaj dite mbetet i hapur.

Në rast se UEFA vendos ta marrë në shqyrtim dhe të miratojë apelin e Real Madridit, pasojat për trashëgiminë sportive të Barcelonës do të ishin kolosale, duke rrezikuar të gjithë titujt e siguruar brenda periudhës së vënë në dyshim.