Bruno Fernandes sqaron qëndrimin e tij te Manchester United pas bisedës me Carrickun

Pas një takimi sqarues me trajnerin Michael Carrick të martën, Bruno Fernandes ka vendosur të vazhdojë të ardhmen e tij te Manchester Unitedi.

Kapiteni portugez u përball me kritika nga tifozët pasi vuri në dyshim mënyrën e lojës së Carrickut pas disfatës 4-1 kundër Comos në Ligën e Kampionëve. Në sfidën pasuese, humbjen 3-0 ndaj Bournemouthit të dielën, Fernandes qëndroi në stol gjatë gjithë ndeshjes. Kur doli për t’u ngrohur në “Old Trafford”, tifozët reaguan në mënyra të ndryshme.

Pas këtyre zhvillimeve, nisën spekulimet për vazhdimin e tij në klub. Marrëveshja e mesfushorit përfundon në qershor të vitit 2027, por Unitedi mund ta zgjasë atë edhe për një sezon. Drejtuesit e INEOS planifikojnë ta përdorin këtë mundësi.

Fernandes u transferua te “Djajtë e Kuq” nga Sporting Lisbona në janar të vitit 2020. Tashmë, pas gati shtatë vjetësh me klubin, një pjesë e tifozëve mendonte se tensionet e përsëritura me trajnerin mund ta përfundonin më herët se pritej qëndrimin e tij në “Old Trafford”.

Klubi i bëri të ditur Carrickut se do të drejtonte ekipin në ndeshjen e së shtunës kundër Chelseat, ndonëse kishte raportime se mund të shkarkohej. Pas konfirmimit, trajneri 45-vjeçar u takua me kapitenin për të diskutuar mosmarrëveshjen.

Takimi mes Carrickut dhe Fernandesit u zhvillua të martën në mëngjes, në qendrën stërvitore të Unitedit në Carrington, përpara seancës stërvitore. Sipas The Guardian, lojtari 32-vjeçar i tha trajnerit se është “plotësisht i përkushtuar” ndaj klubit dhe dëshiron ta ndihmojë skuadrën të dalë nga vështirësitë e këtij sezoni.

Biseda pasoi vendimin e Carrickut për të mos e përfshirë në formacionin titullar lojtarin me fanellën numër tetë ndaj Bournemouthit. Trajneri këmbënguli se zgjedhja ishte bërë “vetëm për arsye futbollistike”.

Fernandes pati rol vendimtar për Manchester Unitedin sezonin e kaluar: dha 21 asistime në Ligën Premier, duke vendosur rekord, dhe ndihmoi ekipin të rikthehej në Ligën e Kampionëve.