Brajan Gruda rikthehet në Bundesliga, RB Leipzig gjen akordin me Brighton

Transferimi i Brajan Grudës tashmë është drejt mbylljes. Mesfushori sulmues shqiptar do të jetë sërish pjesë e RB Leipzig në sezonin e ardhshëm.

“Sky” raporton se klubi gjerman ka arritur një marrëveshje në parim me Brighton & Hove Albion për kalimin e 22-vjeçarit, i cili pritet të rikthehet në Bundesliga.

Formula e dakordësuar mes palëve është huazim me detyrim blerjeje, që do të hyjë në fuqi nëse përmbushen disa kushte të caktuara. Nëse këto realizohen, Leipzig pritet t’i paguajë Brightonit nga 25 deri në 30 milionë euro.

Futbollisti shqiptar është i njohur me ambientin e Leipzigut, pasi në gjysmën e dytë të sezonit të kaluar luajti aty në formë huazimi. Gjatë kësaj periudhe, ai regjistroi 14 paraqitje, shënoi tre gola dhe dha tre asistime.

Dy vite më parë, Brighton kishte investuar mbi 31 milionë euro për ta marrë Grudën nga Mainz 05, por eksperienca e tij në Angli nuk përmbushi pritshmëritë, pasi ai nuk arriti të fitonte një rol me peshë në ekip.

Tani, Gruda do të ketë një tjetër mundësi në Bundesliga, ku synon të gjejë më shumë vazhdimësi dhe të konfirmojë potencialin e madh që e ka shoqëruar që në hapat e parë të karrierës.