Besiktasi zbulon kohëzgjatjen e mungesës së Milot Rashicës pas dëmtimit me Kosovën

Milot Rashica do të jetë jashtë fushës për afërsisht një muaj, pasi pësoi lëndim në ndeshjen e Kosovës ndaj Austrisë, të zhvilluar më 4 tetor.

Futbollisti kosovar u zëvendësua në minutën e 88-të, pasi ndjeu shqetësime në kofshë. Pas kthimit te Besiktasi, ai iu nënshtrua kontrolleve të specializuara mjekësore.

Sipas klubit, analizat e kryera nga ekipi mjekësor, së bashku me rezonancën magnetike në spitalin Acıbadem Altunizade, evidentuan një tërheqje dhe gjakderdhje në pjesën e sipërme të muskulit të kofshës.

“Pas rikthimit në vendin tonë të lojtarit tonë Milot Rashica, i cili nuk mundi ta vazhdonte ndeshjen për shkak të një lëndimi në kofshë të pësuar në minutën e 88-të të ndeshjes së Kombëtares së Kosovës kundër Austrisë më 4 tetor 2026, vlerësimi i kryer nga stafi ynë mjekësor dhe rezonanca magnetike e realizuar në spitalin Acıbadem Altunizade zbuluan një tërheqje dhe gjakderdhje në muskulin e pjesës së sipërme të kofshës. Trajtimi për lojtarin tonë ka nisur nga stafi ynë mjekësor”, njoftoi klubi.

Për pasojë, Rashica pritet të humbasë disa ndeshje të Besiktasit gjatë periudhës së rikuperimit, e cila parashikohet të zgjasë rreth një muaj.