Besiktasi i jep Salahut 24 orë për t’iu përgjigjur ofertës së majme

Mohamed Salah është vënë përballë një ultimatumi nga Besiktasi, që po bën përpjekje intensive për ta transferuar sulmuesin egjiptian në Stamboll.

Mediat turke raportojnë se klubi i ka lënë 34-vjeçarit një afat prej vetëm 24 orësh për të vendosur nëse do ta miratojë propozimin përfundimtar, i cili përfshin kushte financiare shumë të favorshme.

Oferta e Besiktasit parashikon një marrëveshje dyvjeçare dhe një pagë prej 15 milionë eurosh për sezon për ish-yllin e Liverpoolit. Realizimi i këtij transferimi do ta kthente Salahun në një prej lojtarëve më të paguar, ndërsa ardhja e tij do të përbënte një nga goditjet më të mëdha në historinë e futbollit turk.

Përmes vendosjes së këtij afati, drejtuesit e Besiktasit kanë treguar se synojnë ta mbyllin çështjen pa bisedime të zgjatura dhe presin një vendim të menjëhershëm nga futbollisti.

Mbetet për t’u mësuar nëse Salah do të zgjedhë Turqinë si destinacionin e ardhshëm të karrierës, çka do të ishte një nga lëvizjet më të papritura të afatit kalimtar. Ai u largua nga Liverpooli në përfundim të sezonit, kur i skadoi kontrata me klubin anglez.