Benoit Trémoulinas synon rikthimin te Bordeaux pas gjashtë vitesh pension dhe një dekade jashtë fushave

Pas tri ndërhyrjeve kirurgjikale në gju dhe largimit nga futbolli në vitin 2019, ish-mbrojtësi i Francës, Benoit Trémoulinas, po përgatitet për një rikthim të pazakontë në moshën gati 41-vjeçare. Synimi i tij është të luajë sërish për klubin e zemrës, Girondins de Bordeaux.

“I dhashë gjithçka dhe provova çdo mundësi. Por, pas tre operacioneve në gju brenda dy vitesh e gjysmë, gjendja ime fizike nuk më lejonte ta vazhdoja karrierën”, deklaroi Trémoulinas në shkurt të vitit 2019, kur njoftoi tërheqjen nga futbolli në moshën 33-vjeçare.

Ish-mbrojtësi i majtë, i cili ka luajtur pesë herë me kombëtaren franceze, nuk u dorëzua pa luftuar.

Në një rrëfim për Canal+, ai tregoi se gjatë periudhës te Sevilla kishte marrë një numër të madh injeksionesh kortikosteroide. “Stafi mjekësor i Sevillas më dha shumë injeksione. Në tre muajt e parë, dhimbja në gju u bë shumë e fortë. Në sezonin tim të dytë, 2015-16, më është dashur të bëj ndoshta gjashtë ose shtatë injeksione gjatë sezonit, që është tepër”, tha ai.

Trémoulinas zbuloi gjithashtu se kirurgët e kishin paralajmëruar për pasojat. “Të gjithë më thanë: ‘Më falni që po e them, por ajo që po bëni është marrëzi’. Ndoshta një injeksion herë pas here, një herë në vit për të maskuar dhimbjen në një ndeshje të madhe, mund të kuptohet, por gjashtë ose shtatë janë vetëvrasje!”, u shpreh ish-futbollisti.

Dhjetë vjet pas paraqitjes së tij të fundit si profesionist me Sevillan, ai dëshiron të rikthehet në fushë në Divizionin e Gjashtë. Ndeshjen e fundit e luajti më 5 maj 2016, kur qëndroi 74 minuta në fitoren 3-1 ndaj Shakhtar Donetsk, në takimin e dytë të gjysmëfinaleve të Ligës së Evropës.

“Po e ndjekim programin hap pas hapi. Po rikthehemi gradualisht në ritmin e duhur dhe po ecim përpara me vendosmëri, pa harruar të shijoj gjithçka. Mos e humbisni episodin e radhës”, shkroi ai në Instagram në fund të shtatorit.

Të martën, në një intervistë për gazetën L’Equipe, pak para se të mbushë 41 vjeç, Trémoulinas e bëri edhe më të qartë objektivin e tij: “Me shumë përulësi dhe pa pretendime, synimi im është të rikthehem dhe të luaj për Girondins de Bordeaux”.

“Nëse gjuri im e përballon, do të luaj përsëri”

Ish-futbollisti ka nisur prej kohësh përgatitjet për këtë rikthim. Trémoulinas po punon prej pesë javësh për të përmirësuar gjendjen e tij fizike.

“Kam planifikuar të bashkohem me grupin në stërvitje pas dy javësh. Më pas do t’i jap vetes edhe disa javë për të parë nëse mund ta përballoj ritmin dhe për të rregulluar seancat stërvitore. Nëse gjuri im mban, do të rikthehem të luaj”, deklaroi ai për L’Equipe.

Në Francë, ky rikthim shihet edhe si një dëshmi e lidhjes së fortë me Bordeaux. I formuar në akademinë e Girondins, Trémoulinas zhvilloi 220 ndeshje me klubin nga viti 2007 deri në 2013, duke shënuar tetë gola dhe duke dhënë 35 asistime. Më pas ai luajti për Dynamo Kyiv në sezonin 2013-14, St-Etienne në vitin 2014 dhe Sevillan nga 2014 deri në 2017.

Me Bordeaux, ai pati një rol të rëndësishëm nën drejtimin e Laurent Blanc. Gjatë kësaj periudhe fitoi titullin e Ligue 1 në sezonin 2008-09, Kupën e Francës në sezonin 2012-13, Kupën e Ligue në sezonin 2008-09 dhe dy Superkupa të Francës. Po në sezonin 2008-09, ai u përzgjodh në Ekipin e Sezonit të Ligue 1.