Bellingham dërgon Anglinë në gjysmëfinale, “Tre Luanët” mposhtin Norvegjinë pas vazhdimeve

Anglia siguroi vendin në gjysmëfinale të Kupës së Botës 2026, pasi kaloi Norvegjinë me shifrat 2-1 pas vazhdimeve, në një çerekfinale me shumë kthesa.

Ishte Norvegjia ajo që u shfaq më kërcënuese në fillim dhe gjeti avantazhin në minutën e 36-të.

Martin Odegaard shërbeu për Andreas Schjelderup, ndërsa ky i fundit goditi bukur nga jashtë zone dhe, me ndihmën e shtyllës, mposhti Jordan Pickfordin për 1-0. Goli u quajt i rregullt edhe pas kontrollit në VAR.

Anglezët reaguan në fund të fraksionit të parë. Në minutën e 45+2, Anthony Gordon pasoi saktë për Jude Bellinghamin në zonë dhe mesfushori i Real Madridit barazoi menjëherë me një goditje të parë, duke çuar rezultatin në 1-1.

Menjëherë më pas, Harry Kane arriti të dërgonte topin në rrjetë, por goli i tij nuk u lejua për pozitë jashtë loje.

Në pjesën e dytë, Norvegjia besoi se kishte rimarrë epërsinë në minutën e 55-të, kur Torbjorn Lysaker Heggem shënoi, por pas ndërhyrjes së VAR-it goli u anulua për faull në nisjen e aksionit.

Përfaqësuesja skandinave vijoi të sulmonte dhe goditi edhe traversën, por nuk mundi të realizonte golin e dytë, teksa 90 minutat përfunduan në barazim 1-1.

Në vazhdime, njeriu vendimtar për Anglinë u bë sërish Jude Bellingham. Në minutën e 93-të, pas një ndërhyrjeje të shkëlqyer të portierit Orjan Nyland ndaj një goditjeje me kokë të Harry Kanes, topi mbeti për Bellinghamin, i cili nuk fali dhe shënoi për 2-1.

“Tre Luanët” patën një tjetër mundësi të artë në minutën e 99-të, kur arbitri Clement Turpin sinjalizoi penallti për Anglinë. Megjithatë, pas rishikimit në VAR, vendimi u tërhoq.

Gjatë pjesës së dytë të vazhdimeve, Anglia u duk më afër golit të tretë. Djed Spence dhe Bukayo Saka testuan Orjan Nyland me dy tentativa të rrezikshme, por portieri norvegjez reagoi shumë mirë dhe e mbajti skuadrën e tij në garë.

Norvegjia nuk ia doli të gjente barazimin në minutat e fundit dhe Anglia vulosi kalimin në gjysmëfinale, duke mbajtur gjallë synimin për të fituar Kupën e Botës.

Jude Bellingham rezultoi protagonisti absolut i “Tre Luanëve”, pasi me dy golat e tij përmbysi ndeshjen dhe i siguroi Anglisë një vend mes katër skuadrave më të mira të turneut. Tani anglezët presin rivalin që do të dalë nga përballja mes Argjentinës dhe Zvicrës.