Bayern Munich rikthen në listën e dëshirave Jules Kounden e Barcelonës

Bayern Munich po shqyrton sërish mundësinë për të transferuar Jules Kounden nga Barcelona gjatë afatit kalimtar të janarit, pasi klubi gjerman synon të përforcojë repartin e mbrojtjes.

Sipas gazetës Sport, mbrojtësi francez është zgjedhja kryesore e trajnerit Vincent Kompany për këtë repart. Megjithatë, realizimi i operacionit lidhet me largimin e mëparshëm të Kim Min-jae, për të cilin bavarezët presin të arkëtojnë të paktën 40 milionë euro.

Klubi i ka autorizuar koreano-jugorit të negociojë një transferim në janar. Përveç shumës së pritshme prej 40 milionë eurosh, Bayern Munich do të kursente edhe pagën vjetore prej 8 milionë eurosh të futbollistit. Tottenham dhe Aston Villa janë të gatshme të bëjnë oferta, ndërsa Milani ka paraqitur tashmë një kërkesë fillestare zyrtare te klubi bavarez.

Të ardhurat nga shitja e Kim Min-jae do të përdorëshin drejtpërdrejt për financimin e bisedimeve me Barcelonën për Kounden, vlera e të cilit në Transfermarkt llogaritet në 60 milionë euro.

Megjithatë, francezi nuk e ka prioritet largimin nga Barcelona. Kounde dëshiron të vijojë qëndrimin në skuadër dhe të luftojë për një vend titullari nën drejtimin e Hans Flick. Aftësia për të luajtur si në krahun e djathtë, ashtu edhe në qendër të mbrojtjes, e ka kthyer atë në alternativën e preferuar të Kompany për pjesën e dytë të sezonit.

Në rast se nuk sigurohet një përgjigje pozitive nga drejtuesit e Barcelonës, klubi nga Mynihu po shqyrton edhe mundësinë e transferimit të Tomas Araujo nga Benfica. Mbrojtësi portugez vlerësohet me 35 milionë euro.

Ndërkohë, Barcelona po vlerëson situatën e kufirit të pagave përpara se t’u japë një përgjigje përfundimtare kërkesave të Bayern Munich. Largimi i një prej titullarëve do t’u krijonte katalunasve hapësirën për të bërë përforcime në dimër ose për të tentuar afrimin e një mesfushori qendror.

Klubi spanjoll e konsideron Kounden një lojtar me vlerë jo më të ulët se 60 milionë euro dhe do të kërkonte që kjo shumë të paguhej e gjitha në një këst për të miratuar transferimin.