Bayern Munich përcakton planin mjekësor për Jamal Musialën pas dy episodeve të kolapsit

Gjendja e Jamal Musialës ka ngritur shqetësime të reja pas dy rasteve të kolapsit që mesfushori i Bayern Munichut pësoi gjatë ndeshjeve miqësore parasezonale kundër RB Leipzigut dhe 1. FC Heidenheimit.

Pavarësisht situatës, klubi bavarez ka hartuar një strategji të përcaktuar për menaxhimin e gjendjes së 23-vjeçarit. Hapi i parë parashikon reduktimin e ngarkesës në stërvitje dhe rregullimin e trajtimit mjekësor që po ndjek futbollisti.

Reprezentuesi i Gjermanisë pritet të zhvillojë fillimisht tre deri në katër ditë përgatitje individuale. Më pas, rikthimi i tij në seancat e përbashkëta me skuadrën do të bëhet në mënyrë të gradualshme.

Një tjetër pjesë e planit është ndryshimi i dozës së medikamenteve që Musiala po përdor, një informacion i konfirmuar edhe nga drejtori sportiv i Bayern Munichut, Max Eberl.

Vlerësimet mjekësore tregojnë se do të duhen rreth 10 deri në 14 ditë që doza e re të japë efektin e plotë. Objektivi është shmangia e episodeve të tjera neurologjike dhe stabilizimi i gjendjes së futbollistit.

Bayern Munich nuk është përballur për herë të parë me këtë situatë, pasi klubi ka qenë prej kohësh i informuar për gjendjen e Musialës. Edhe shokët e skuadrës janë vënë në dijeni dhe janë udhëzuar se si të reagojnë në përputhje me rrethanat.

Edhe stafi mjekësor i Kombëtares së Gjermanisë kishte dijeni për gjendjen e tij gjatë Botërorit në Amerikën e Veriut.

Ky problem shfaqet në një periudhë të pafavorshme për Musialën, i cili sapo kishte nisur të rikthehej në formën e tij më të mirë pas një mungese të gjatë të shkaktuar nga dëmtimi.

Megjithatë, për Bayern Munichun përparësi absolute mbetet shëndeti i futbollistit. Klubi nuk ka ndërmend të ndërmarrë asnjë rrezik sa i përket rikthimit të tij në fushë.