Bayern Munich harton listën e kandidatëve për pasuesin e Neuerit, në fokus disa portierë të njohur

Bayern Munichu po përgatitet për një ndryshim të rëndësishëm në portë pas largimit të mundshëm të Manuel Neuerit, ndërsa drejtuesit kanë nisur të shqyrtojnë një numër alternativash për merkaton e verës.

Sipas Sky Sport Germany, klubi bavarez synon të afrojë një portier me përvojë në verën e ardhshme, kur kontratat e Manuel Neuer dhe Sven Ulreich të përfundojnë.

Edhe pse bisedimet me të dy portierët për të ardhmen e tyre vijojnë, Bayern Munichu ka nisur ndërkohë të studiojë opsionet për zëvendësimin e tyre të mundshëm.

Jonas Urbig shihet si kandidati i planifikuar për të marrë vendin e Neuerit dhe klubi nuk synon të transferojë një tjetër portier për të konkurruar drejtpërdrejt me të.

Plani është që në skuadër të afrohet një portier i sprovuar, i cili do të ketë rolin e rezervistit. Për këtë pozicion, bavarezët kanë përfshirë në listën e tyre disa emra të njohur.

Kandidatët e mundshëm janë Oliver Baumann (Hoffenheim), Marvin Schwabe (FC Koln), Bernd Leno (Fulham), Finn Dahmen (Augsburg), Juan Musso (Atletico Madrid), Kevin Trapp (Paris FC), Nick Pope (Newcastle United), Rui Silva (Sporting Lisbona), Koen Casteels (Al Qadsiah), Frederik Ronnow (Union Berlin) dhe Lukas Hradecky (Monaco).