Barcelona synon të tejkalojë ofertën prej 100 milionë eurosh për Julian Alvarez

Barcelona nuk ka ndërmend të tërhiqet nga gara për Julian Alvarez të Atletico Madridit, i cili është objektivi kryesor i klubit katalunas për afatin kalimtar të verës.

Catalunya Radio raporton se drejtuesit e Barcelonës po punojnë në prapaskenë për ta përmirësuar, përmes bonuseve, propozimin prej 100 milionë eurosh që u refuzua për sulmuesin e Atletico Madridit.

Nga ana tjetër, Atletico Madrid vazhdon ta kundërshtojë shitjen e yllit të skuadrës te një rival i drejtpërdrejtë për titullin dhe këmbëngul te klauzola e lirimit me vlerë 500 milionë euro. Sipas disa burimeve, klubi madrilen do të parapëlqente transferimin e tij tek Arsenali.

Alvarez konsiderohet nga Barcelona si dëshira kryesore e Hansi Flick. Klubi shpreson se një tjetër deklaratë publike e sulmuesit do ta shtyjë Atleticon të miratojë largimin e tij gjatë verës.

Ndërkohë, RFEF ka nisur hetim ndaj Barcelonës pas ankesës së Atletico Madridit lidhur me çështjen Julian Alvarez.

Federata Spanjolle e Futbollit hapi një dosje informative pasi Atletico Madrid dorëzoi një ankesë zyrtare, në të cilën akuzoi Barcelonën se kishte zhvilluar negociata të paautorizuara për transferimin.

Megjithatë, Barcelona është e qetë përballë pretendimeve ligjore dhe pret kthimin e reprezentuesit argjentinas nga pushimet verore më 10 gusht, me synimin për të nxitur përparimin e operacionit në treg.