Barcelona synon kredi 210 milionë euro për të mbuluar afrimet e merkatos së verës

Barcelona ka hartuar planin financiar me të cilin synon të realizojë afrimin e objektivave të saj në afatin kalimtar të verës.

Sipas raportimit të Cadena SER, klubi katalanas po punon në mënyrë aktive për të siguruar një kredi prej 210 milionë eurosh, të mbështetur mbi të drejtat e ardhshme të transmetimit televiziv, përmes një operacioni të strukturuar si Senior Media Notes.

Ky injektim i ri kapitali është menduar për t’i garantuar klubit likuiditet gjatë merkatos aktuale të transferimeve.

Nga ana tjetër, drejtuesit e Barcelonës presin që edhe sezonin e ardhshëm të kapërcejnë kufijtë e Fair Play Financiar të La Ligas, situatë që do të sillte sërish pengesa për regjistrimin e lojtarëve.

Burime nga klubi bëjnë të ditur se vonesat në punimet e stadiumit Spotify Camp Nou kanë bllokuar përkohësisht të ardhurat e parashikuara nga stadiumi, duke krijuar presion afatshkurtër mbi rrjedhën e parasë.

Për këtë arsye, zyrtarët e klubit kanë dhënë miratimin për këtë paketë financimi, me qëllim realizimin e marrëveshjeve të ardhshme në treg. Ky buxhet është i ndarë nga 80 milionë eurot që janë investuar tashmë për të siguruar sulmuesin e krahut Anthony Gordon.

Aktualisht, Barcelona po punon për të firmosur me anësorin e Borussia Dortmund, Karim Adeyemi, si dhe me sulmuesin e Atletico Madrid, Julian Alvarez.