Barcelona siguron 210 milionë euro hua, në plan Alvarez, Cancelo dhe Adeyemi

Barcelona ka marrë një kredi prej 210 milionë eurosh, e cila do të shërbejë për merkaton e verës, por edhe për të përballuar një pjesë të kostove operative të klubit.

Siç raporton Goal.com, drejtuesit e klubit katalanas e kanë ndërmarrë këtë hap për të krijuar mundësi financiare për afrimin e Julian Alvarez, Joao Cancelo dhe Karim Adeyemi, ndërsa një pjesë e shumës do të përdoret për nevojat ekzistuese të klubit.

Burimet bëjnë të ditur se kjo hua është siguruar duke u mbështetur te të ardhurat e parashikuara për sezonin e ardhshëm, në një moment kur Barcelona vijon të ketë vështirësi me likuiditetin.

Prioriteti kryesor i klubit është sulmuesi i Atletico Madridit, Julian Alvarez, i cili vlerësohet si zëvendësimi ideal i Robert Lewandowskit pas kalimit të polakut te Chicago Fire.

Ndërkohë, përveç përforcimeve në sulm, Barcelona ka në objektiv edhe rikthimin e Joao Cancelos, si edhe transferimin e Karim Adeyemit, me synimin për të shtuar konkurrencën brenda skuadrës.

Gjithsesi, jo e gjithë vlera prej 210 milionë eurosh pritet të shkojë për blerje lojtarësh. Sipas raportimeve, një pjesë e madhe e saj do të përdoret për pagesat e stafit dhe për shpenzime të tjera operative të klubit.

Me këto lëvizje, Barcelona synon të paraqitet me një skuadër më konkurruese në sezonin e ri, duke tentuar njëkohësisht të vendosë më shumë qëndrueshmëri në situatën e saj financiare.