Barcelona shqyrton yllin e Villarrealit si plan alternativ për Julian Alvarezin

Vështirësitë për të siguruar shërbimet e Julian Alvarezit nga Atletico Madridi gjatë kësaj vere kanë bërë që Barcelona të nisë shqyrtimin e alternativave të tjera.

Sipas Radio Marca, në listën e klubit katalunas është përfshirë sulmuesi i Villarrealit, Ayoze Perez, i cili shihet si një zëvendësim i mundshëm për argjentinasin e Atletico Madridit.

Barcelona vazhdon ta ndjekë Alvarezin dhe nuk është tërhequr nga gara për të, megjithatë vendosmëria e Atleticos për ta mbajtur në skuadër po i zvogëlon gjithnjë e më shumë mundësitë e një transferimi.

Ndërsa afati kalimtar i verës po i afrohet fundit, Barça po përgatitet për zhvillimet sportive dhe Perez është mes futbollistëve që po vlerësohen nga drejtuesit e klubit, përfshirë trajnerin Hansi Flick.

Sulmuesi spanjoll 33-vjeçar ka në kontratë një klauzolë lirimi prej 30 milionë eurosh, por marrëveshja mund të realizohet edhe për një shumë më të vogël. Raportohet gjithashtu se ai dëshiron ta sigurojë kalimin në Camp Nou.

Karakteristikat e Perezit si sulmues i dytë përshtaten me kërkesat e Flick. Gjatë sezonit të kaluar, ai regjistroi shtatë gola dhe pesë asistime në të gjitha garat.