Barcelona përgatit ofertën prej 70 milionë eurosh për Rodrin

Barcelona synon të përshpejtojë transferimin e Rodri Hernandezit dhe po përgatit një propozim të ri, me vlerë rreth 70 milionë euro, për mesfushorin e Manchester Cityt, raporton Diario SPORT.

Klubi anglez ka zbutur kërkesën fillestare prej 80 milionë eurosh dhe mund ta pranojë shitjen e Rodrit nëse Barcelona e çon ofertën në rreth 70 milionë euro.

Propozimi i parë zyrtar i katalanasve, që përfshinte 45 milionë euro të garantuara dhe 10 milionë euro në formën e bonuseve, u hodh poshtë menjëherë nga kampionët e Anglisë.

Barcelona më pas paraqiti një ofertë të dytë prej 60 milionë eurosh, duke u përpjekur të reduktojë diferencën financiare me Manchester Cityn.

Paralelisht me negociatat, trajneri Hansi Flick ka komunikuar drejtpërdrejt me Rodrin për t’i paraqitur rëndësinë dhe rolin kryesor që mesfushori do të ketë në planin taktik të Barcelonës për sezonin 2026/27.

Në Katalonjë besohet se palët janë pranë një marrëveshjeje. Barcelona shpreson ta mbyllë transferimin dhe ta prezantojë Rodrin si futbollist të ri të saj gjatë javës së ardhshme.