Barcelona nxiton për Julian Alvarez, ndërsa te Atletico Madrid shtohen paqartësitë

Çështja e së ardhmes së Julian Alvarez është rikthyer sërish në fokusin e merkatos, pas një zhvillimi të ri që lidhet me situatën e tij sportive dhe kontraktuale.

Te Atletico Madrid e dinë se sulmuesi argjentinas 26 vjeç ka shfaqur javët e fundit vullnetin për të ndërruar ambient, edhe pse mbetet i lidhur me kontratë deri në vitin 2030 dhe konsiderohet një prej elementëve më të rëndësishëm të skuadrës.

“La Arana”, siç njihet sulmuesi, mësohet se e ka bërë tashmë të qartë se nuk dëshiron të vazhdojë te klubi madrilen, një sinjal që ka shtuar shqetësimin në “Metropolitano”.

Gjithsesi, e gjithë panorama vijon të kushtëzohet nga zhvillimet e Kupës së Botës, faktor që ka frenuar çdo hap konkret dhe ka lënë të hapura ende disa çështje.

Barcelona mbetet pista më e mundshme për të ardhmen e lojtarit, ndonëse deri në këtë pikë Atletico ka mbajtur një qëndrim të prerë dhe pa lëkundje.

Sipas të përditshmes AS, klubi katalanas nuk ka ndërmend ta lërë të zvarritet më tej këtë periudhë pasigurie dhe synon të përshpejtojë vendimmarrjen sapo të marrë fund angazhimi i sulmuesit në Kupën e Botës, që mund të përfundojë në ditët e ardhshme ose të vijojë edhe për një javë tjetër.

Në të njëjtën kohë, Barça po analizon edhe opsione të tjera, nëse marrëveshja përfundimisht nuk realizohet.