Barcelona ndryshon kurs pas pengesës për Julian Alvarez, piketon Darwin Nunezin

Darwin Nunez ka hyrë në listën e alternativave që Barcelona po vlerëson për të përforcuar repartin ofensiv gjatë verës me një kosto më të përballueshme.

Mundo Deportivo raporton se Julian Alvarez vazhdon të jetë zgjedhja e parë e klubit katalanas. Megjithatë, realizimi i kësaj lëvizjeje është ndërlikuar ndjeshëm, pasi Atletico Madridi ka përjashtuar zyrtarisht mundësinë që argjentinasi të largohet.

Përballë kësaj pengese, drejtuesit e Barcelonës kanë filluar të shqyrtojnë kandidatura të tjera që kërkojnë më pak shpenzime për përforcimin e sulmit.

Nevoja për një tjetër futbollist ofensiv mund të shtohet në rast të largimit të Ferran Torresit nga “Camp Nou”. Sulmuesi spanjoll vijon të përflitet për një transferim te Paris Saint-Germain.

Në rrethana të tilla, departamenti sportiv i Barcelonës po ndjek nga afër situatën e Darwin Nunezit si një prej opsioneve të mundshme.

Uruguaiani i është bashkuar aktualisht Al Hilalit në kampin përgatitor që po zhvillohet në Austri, ndërsa pozicioni i tij në klubin saudit nën drejtimin e trajnerit Simone Inzaghi vazhdon të jetë i paqartë.

Futbollisti 26-vjeçar nuk është aktivizuar në kampionatin saudit që prej muajit shkurt. Pas transferimit të Karim Benzemas, kufizimet e rregullores bënë që ai të mbetej jashtë listës së lojtarëve të huaj.