Barcelona i kërkon Flickut të mos përfshihet në përplasjen me Mourinhon përpara ndezjes së El Clasicos

Barcelona i ka përcjellë trajnerit Hansi Flick mesazhin që të mos komentojë rikthimin e Jose Mourinhos në drejtimin e Real Madridit, raporton media spanjolle.

Sipas Diario SPORT, drejtuesit katalanas i kanë rikujtuar teknikut gjerman tensionet e krijuara gjatë periudhës së parë të Mourinhos në Madrid, mes tyre përplasjet me Pep Guardiolën dhe incidentin e bujshëm me ish-zëvendësin e Barcelonës, Tito Vilanovën.

Udhëzimi i klubit ka qenë i drejtpërdrejtë: Flicku nuk duhet të flasë as për Mourinhon, as për Real Madridin.

Trajneri i Barcelonës duket se po e zbaton këtë kërkesë. Para sfidës së parë të kampionatit kundër Elches, ai u pyet për portugezin, por zgjodhi ta mbyllte menjëherë diskutimin.

“A luajmë nesër kundër Real Madridit? Atëherë më pyesni për Elchen”, u përgjigj Flick.

Ndërkohë, Mourinho ka bërë tashmë komente për Barcelonën pas rikthimit në stolin e skuadrës madrilene. Flicku, megjithatë, nuk ka shfaqur gatishmëri për t’iu bashkuar përplasjes verbale mes dy klubeve.

Ky qëndrim pritet të ruhet edhe në vazhdim, ndërsa tekniku i Barcelonës do të tregohet i rezervuar sa herë që në konferencat për shtyp të shfaqet tema e Mourinhos ose e Real Madridit.

Megjithatë, afrimi i El Clasicos pritet t’i bëjë të pashmangshme pyetjet lidhur me trajnerin portugez.

Në këtë mënyrë, Barcelona synon të mos i ofrojë Mourinhos hapësirë për të provokuar një tjetër polemikë.