Atmosferë e shkëlqyer te Kosova, “Dardanët” zhvillojnë seancën e dytë para ndeshjes me Irlandën

Kosova ka kryer stërvitjen e dytë në kuadër të përgatitjeve për përballjen me Irlandën.

Seanca e fundit shënoi edhe grumbullimin e plotë të ekipit, pasi në stërvitjen e së hënës munguan disa futbollistë për shkak të angazhimeve me klubet e tyre.

Gjendja në kampin e “Dardanëve” është mjaft pozitive. Futbollistët po punojnë maksimalisht për të fituar besimin e Franco Fodës dhe për të siguruar minuta në duelin kundër Irlandës.

Kosovën e presin katër ndeshje të vështira në Ligën e Kombeve. Synimi kryesor është përfundimi të paktën në vendin e dytë të grupit, çka do t’i mundësonte ekipit të luante në play-off për ngjitjen në Ligën A. Një rezultat i tillë do të kishte rëndësi edhe për sigurimin e vendit në vazon e dytë në shortin e Kampionatit Evropian 2026.

“Dardanët” do të zhvillojnë edhe dy seanca të tjera stërvitore të mërkurën, në mënyrë që ta presin sa më të përgatitur sfidën me Irlandën.

Ndeshja Kosovë-Irlandë do të luhet të enjten mbrëma në stadiumin “Fadil Vokrri” dhe do të nisë në orën 20:45.//