Arsenalit i hidhet poshtë oferta hapëse për Bruno Guimaraes

Arsenal ka paraqitur një ofertë verbale për mesfushorin e Newcastle United, Bruno Guimaraes.

Oferta, e përcjellë përmes ndërmjetësve dhe me vlerë nën 70 milionë euro, është refuzuar menjëherë nga klubi nga veriu i Anglisë.

Newcastle ka bërë të ditur se nuk synon të marrë në konsideratë oferta për 28-vjeçarin brazilian, i cili aktualisht është i grumbulluar me përfaqësuesen e tij në prag të ndeshjes së fazës së 1/32-ave të Kupës së Botës ndaj Japonisë.

Mesfushori iu bashkua Newcastle nga Lyon në janar 2022 dhe prej asaj kohe është kthyer në një element thelbësor të ekipit të drejtuar nga Eddie Howe.

Ai numëron mbi 150 paraqitje në Ligën Premier dhe 30 gola, ndërsa mban po ashtu një rol të rëndësishëm te Brazili i udhëhequr nga Carlo Ancelotti.

Këtë verë, Newcastle ka shitur tashmë sulmuesin anësor Anthony Gordon te Barcelona në një marrëveshje me vlerë rreth 80 milionë euro, ku përfshihet edhe një klauzolë për përqindje nga shitja e ardhshme.

Ndërkohë, klubi anglez po përballet edhe me interes për Sandro Tonalin, partnerin e Guimaraes në mesfushë, i cili pëlqehet nga Tottenham Hotspur dhe Manchester City.

Sipas The Athletic, humbja e njëkohshme e Guimaraes dhe Tonalit gjatë të njëjtës verë do të përbënte një goditje të rëndë për Newcastle, si në planin sportiv ashtu edhe në atë të imazhit.

Si kapiten dhe një nga figurat më të rëndësishme të Newcastle, Guimaraes gëzon një lidhje të fortë me tifozët, ndërsa largimi i tij do ta cenonte dukshëm ekuilibrin dhe kreativitetin e skuadrës.

Në një verë kur klubi ka humbur tashmë disa lojtarë kyç, një largim tjetër i tij do ta komplikonte edhe më shumë situatën për Eddie Howe dhe projektin afatgjatë të Newcastle.